Sigrieti

Artiklu ppubblikat fil-gazzetta IN-NAZZJON tat-Tnejn 27 ta' Jannar 2014

Lil Salvu Balzan tal-Malta Today iriduh jikxef lil dak, dik jew dawk li għaddewlu l-informazzjoni dwar il-każ tal-commissions illegali li tħallsu fuq ix-xiri taż-żejt. Dan mhuwiex aċċettabbli. Huwa dritt tiegħu bħala ġurnalist li ma jikxifx lil min għaddielu l-informazzjoni. Jekk dan id-dritt jiġi mittiefes ikun qed jitwassal messaġġ ikrah lil min jaf b'xi korruzzjoni u lest jikxifha. Dan il-messaġġ jaqra “Agħlaq ħalqek”.

Skandli bħal dan m’għandhomx jibqgħu sigrieti. Għandna ninkoraġġixxu lil min lest jikxef dawn is-sigrieti u mhux imwerwruh li għada pitgħada ismu se jissemma fil-Qrati u fil-gazzetti.

IN-NISA TA’ HOLLANDE

François Hollande, il-President Franċiż, ukoll kellu sigriet li ma xtaqx jinkixiflu. Kellu relazzjoni bil-moħbi ma’ attriċi iktar żagħżugħa u gustuża mill-girlfriend uffiċjali. Din diġà t-tieni darba li Hollande inqabad iħawwad. Għax il-girlfriend uffiċjali tal-lum ukoll kienet il-maħbuba sigrieta ta’ Hollande meta dan kien miżżewweġ b’erbat itfal. Tassew każ ta’ kif tagħmel jagħmlulek.

Apparti d-dibattitu fuq kemm dan il-President għandu enerġija taħt il-friex, fi Franza qam dibattitu jekk din l-istorja, bir-ritratti b’kollox, kelliex tkun ippubblikata. Hemm min jargumenta li dak li jsir fil-privat għandu jibqa’ fil-privat. Imma l-President Franċiż mhuwiex persuna privata.

Persuna li tokkupa kariga pubblika m’għandha qatt tpoġġi lilha nfisha f’sitwazzjonijiet li bihom tista’ tkun rikattata.

IĊ-ĊINIŻ U S-SEWWIEQ

Kien hemm biljunarju Ċiniż li żar Malta u wkoll xtaq li din iż-żjara tibqa’ sigrieta. Imma hu u jħalli Malta bil-jet privat sab lill-ġurnalisti jistennewh bil-kameras u l-mikrofoni. Ingħad li dan iċ-Ċiniż ġie Malta biex jixtri passaport.

It-Tnejn filgħaxija tal-Labour tgħidx kemm ħaduha bi kbira li daċ-Ċiniż spiċċa fuq NET News. Saħansitra fetħu inkjesta biex jaraw min kellu l-ardir jikxef dan is-sigriet.

Imbagħad l-għada, it-Tlieta filgħodu, l-orizzont toħroġ tgħidilna li l-eks sewwieq tal-Formula Wieħed Jacques Villeneuve tgħix kemm hu ħerqan biex jixtri wieħed mill-passaport ta’ Muscat. Filwaqt li l-Labour ma sab ebda problema jikxef għajn Villeneuve, inkedd bl-ikraħ li nikef iċ-Ċiniż. Tgħid għaliex?

270 KADAVRU

Għad hemm dubji serji dwar x’ġara fil-11 ta’ Ottubru li għadda fit-traġedja li ħalliet 270 immigrant mejta fil-Mediterran. Minkejja l-mistoqsijiet ta’ ġurnalisti lokali u internazzjonali l-Armata Maltija għadha qed tirrifjuta li twieġeb u qed tirrifjuta wkoll li tippubblika dokumenti li jistgħu jagħtu stampa aktar ċara ta’ x’ġara dakinhar.

Jekk l-Armata u l-Gvern Malti m’għandhom ebda responsabbiltà għal dak li ġara għandhom iwieġbu u jippubblikaw kollox. B’hekk ikunu qed isostnu l-pożizzjoni tagħhom u jneħħu kull dubju li jista’ jkun hemm. Jekk le, hemm responsabbiltà kbir x’tinġarr.

Fuq kollox dan il-Gvern ġie elett bl-għajta tat-trasparenza u m’għandux minflok jagħtina politika tas-sigrieti.

L-ISQOF AWŻILJARJU

Ma nistax naqbel mas-suġġeriment tal-Isqof Awżiljarju Mons Charles Scicluna li l-vot li għandu jittieħed fil-Parlament dwar il-liġi tal-Unjoni Ċivili jkun wieħed sigriet.

Il-membri tal-Parlament huma rappreżentanti tal-poplu u għandhom jaqdu dmirhom mingħajr ebda biża mill-istess poplu. Vot sigriet ikun vot kodard. Kull vot fil-Parlament għandu jkun pubbliku anke għaliex in-nies li eleġġew lill-Membru Parlamentari għandhom kull dritt ikunu jafu kif ivvota.