Max huwa ġurdien kbir, jew far, li ltqajt
miegħu f’wieħed mill-aħħar programmi ta’ TVHEMM qabel xkanawni ‘l barra
mill-PBS. Dan l-aħħar erġajt rajt l-istorja tiegħu fuq You Tube.
Id-destin ta’ dan il-ġurdien kien li jmut
f’eta’ żgħira. Kien qed jitrabba biex iservi ta’ ikla għal serp. Iżda min qed
irabbi lil Max iddeċieda li jeħilsu minn dan id-destin u beda jrabbieh bħala
annimal domestiku. F’kemm ilni ngħidlek dan il-ġurdien sar il-pet ta’ din il-familja.
Ħa ngħiduha kif inhi, far addomestikat ma
tiltaqax miegħu ta’ kuljum. Allura ma setax jonqos li kellu jolqot għajnejn il-producers li
kienu jaħdmu miegħi u stiednuh fil-programm.
Niftakarni nibda
l-programm billi nintroduċi lil Max hu u jdur f’idejja,
fuq il-laptop, fuq spallti u
kullimkien. U l-għada kulħadd ikellimni fuqu. Dan il-far li kienet miktuba
għalih li jispiċċa fl-istonku ta’ serp, spiċċa protagonist fi programm
tat-televixin.
Reġa’ fetaħ l-istaġun tal-kaċċa fir-Rebbiegħa.
Iltaqjt ma’ kaċċaturi li ħadu gost li din is-sena wara ħafna snin, il-Gvern
Laburista ddeċieda li jħallihom jisparaw anke fil-Ħdud u l-festi. Iżda ltqajt
ukoll ma’ kaċċaturi li din iż-żieda xejn ma ħadu gost biha.
Dawn tal-aħħar irraġunaw li b’iktar sparar
fil-ġranet meta l-familji joħorġu jgawdu l-kampanja Maltija, se jiżdiedu dawk
li jħarsu bl-ikrah lejhom u lejn id-delizju tagħhom. Qaluli li dak li se jiġri
din is-sena se jkun qed isaħħaħ l-argumenti ta’ min qed jiġbor il-firem biex
titwaqqaf għal kollox il-kaċċa fir-Rebbiegħa.
STORBJU
Bħal-lum ġimgħa l-MEPA approvat il-proġett
tal-power station il-ġdida li se jkollha ġirien magħha tanker b’ħażna ta’ gass
daqs ħames koppli tal-Mosta. Jekk xbajt tisma’ fuq dan it-tanker ngħidlek li
nifhmek, iżda tista’ tkompli taqra għax mhux fuqu se nikteb.
Ġara li għal-laqgħa pubblika li matulha l-Bord
tal-MEPA iddeċieda dan il-permess kontroversjali, kif mistenni, inġabru ħafna
nies. Ġara wkoll li ħafna minn dawn in-nies infexxu f’ibbuwjar, insulti u
storbju ieħor kull x’ħin fetaħ ħalqu xi ħadd mill-Partit Nazzjonalista u
persuni oħra li kienu qed jopponu jew iqanqlu xi dubji dwar dan il-proġett.
M’għandix dubju li ħafna minn dawn in-nies
intalbu jiġu għal din il-laqgħa minn persuni qrib il-Gvern Laburista bl-iskop
li jintimidaw lil kull min jazzarda jlissen kelma kontra l-proġett.
Hija ħasra li dawk li tant sejjħu lilhom
infushom “progressivi” għadhom ma fehmux jew ma jridux jifhmu kif taħdem
demokrazija moderna.
IL-MINA
Il-Ħamis li għadda l-Ministru Joe Mizzi inawgura
l-proġett tal-mina l-ġdida fi Triq Diċembru 13. Dan kien proġett ieħor ta’
Gvern Nazzjonalista li tlesta taħt il-Labour. Dan il-proġett sewa €7 miljuni,
li 85% minnhom tħallsu minn fondi tal-Unjoni Ewropea.
Għad-diskors tal-inawgurazzjoni, wara dahar
il-Ministru Joe Mizzi poġġew biċċa perspex bi kliem abjad fuq sfond ċelesti
tgħid “Gvern li jaħdem”. Ma kitbux li dan il-Gvern huwa magħmul mill-istess
nies li ma ridux li Malta tissieħeb fl-Unjoni Ewropea; l-istess nies li qalulna
li rebaħ il-Partnership; l-istess nies li fil-Parlament ivvotaw kontra
t-trattat ta’ sħubija. Kieku kitbu dan kollu fuq il-perspex, il-mina jkollhom
bżonnha biex jistaħbew fiha.
Meta nagħmel dan l-argument ġieli nsib min jgħidli
li dan huwa argument “tal-bieraħ” għax illum l-isħubija ta’ Malta fl-Unjoni
Ewropea hija aċċettata minn kulħadd, inkluż mill-Partit Laburista. Lil dawn infakkarhom
li ftit tal-ġimgħat ilu, il-kandidat stilla tal-Partit Laburista
għall-elezzjoni tal-Parlament Ewropew ftaħar li llum qed jiltaqa’ ma’ ħafna nies
li jgħidulu kemm kellu raġun il-Partit Laburista meta qalilna li l-aħjar għażla
hija l-Partnership.
IL-LISTA
Flimkien mal-Viċi
Kap Beppe Fenech Adami u mad-Deputat Ryan Callus ħadt sehem f’konferenza
għall-aħbarijiet dwar kif il-Gvern Laburista ħadem il-wegħda “tista’ ma taqbilx
magħna imma tista’ taħdem magħna.”
Qabel bdejna ftehmna
la ma ndumux ħafna nitkellmu. Biex ma nirrepetux, ftehmna wkoll min se jkun qed
jgħix xiex. Iddeċidejna li Beppe kellu jaqra l-lista li ħejjejna ta’ nies qrib
il-Partit Laburista u tal-Prim Ministru Joseph Muscat li ġew premjati b’karigi
u jobs imħallsin tajjeb ħafna.
Ġara li Beppe ma
setax iżomm mal-ftehim li ma ndumux. Tant dam jaqra din l-imbierka lista li
qata’ nifs kulħadd, tiegħu inkluż!
No comments:
Post a Comment