Vapuri

Ippubblikat fil-gazzetta IN-NAZZJON tat-Tnejn 3 ta' Marzu 2014 

“Għal uliedna” hija frażi li spiss tingħad mill-politiċi. Hija ħaġa pożittiva li f’dak kollu li nagħmlu naħsbu wkoll f’dawk li għad iridu jitwieldu. Allaħares viżjoni politika ma tkunx tħares lil hinn mit-tmiem ta’ mandat politiku. Iżda min huma u fejn qegħdin dawn “uliedna”?

Huwa stat ta’ fatt li iktar ma jgħaddi żmien iktar qed insiru pajjiż u kontinent anzjan. F’Malta, bħal fil-kumplament tal-Unjoni Ewropea, il-popolazzjoni qed tikber fl-eta’. Qed jiżdied in-numru ta’ anzjani filwaqt li qed jonqos in-numru ta’ tfal.

Allura jekk vera rridu naħdmu għal “uliedna”, l-ewwel u qabel kollox lil dawn “uliedna” rridu nwellduhom! Biex ngħidu kollox, għandna bżonn li dawn “uliedna” anki għax ‘il quddiem iridu jkunu huma li jaħdmu għalina.

Peress illi t-tfal ma jiġux bil-vapuri, jeħtieġ ninvestu f’aktar inċentivi u għajnuniet biex il-familji żgħażagħ ma jaqtgħux qalbhom iwelldu u jrabbu lil dawn “uliedna”.

CHILD CARE

Dan il-ħsieb żviluppajtu meta din il-ġimgħa żort Child Care Centre fuq stedina tal-Uffiċju tal-Parlament Ewropew f’Malta. Is-servizz ta’ child care kiber ħafna fl-aħħar snin u huwa mistenni jkompli jikber fis-snin li ġejjin.

Qabel kien jeżisti dan is-servizz, il-ġenituri li riedu jkomplu bil-karrieri tagħhom kellhom ‘problema’ għax ma kellhomx fejn iħallu lil uliedhom waqt il-ħin tax-xogħol. Anke l-pajjiż kellu ‘problema’ għax ħafna minn dawn ir-riżorsi umani ma kienux qed ikunu produttivi. Permezz ta’ dawn il-problemi inħolqot opportunita ta’ investiment f’dawn iċ-ċentri, li ssarrfet f’ħafna postijiet tax-xogħol ġodda.

L-istorja tal-iżvilupp taċ-child care turina li dak li jidher bħala ‘problema’ spiss jista’ jkun trasformat f’opportunita.

KREATTIVITA

Fiċ-child care u fl-edukazzjoni bikrija t-tfal għandhom spazju kbir fejn jesprimu ruħhom. Però, aktar ma jikbru dawn it-tfal iktar se jiddaħħlu fil-kaxxa ta’ kurrikulu li ħafna jiddeskrivuh bħala soffokanti.

Nistqarr li ma naqbilx ma’ sistema edukattiva li tkun sempliċiment qed tħejji lit-tfal għall-postijiet tax-xogħol li nafu bihom illum. Nemmen li ċ-ċavetta għall-ħolqien tax-xogħol ta’ għada tinsab f’edukazzjoni li tagħti l-għodda tal-kreattività u tal-ħsieb kritiku. Se jkunu dawk l-aktar innovattivi u li se jkunu kapaċi jieħdu d-deċiżjonijiet it-tajba li se jagħmlu l-iktar suċċess.

SANT

Illejla fuq l-istazzjon nazzjonali se jixxandar dokumentarju dwar wieħed mill-kandidati Laburisti għall-elezzjoni tal-Parlament Ewropew – l-eks Prim Ministru u Mexxej Laburista Alfred Sant.

Dokumentarju u mhux, ikolli nistqarr li huma ħafna dawk li niltaqa’ magħhom li jsemmuli l-kandidatura ta’ Sant b’xofftejhom ftit imkemmxa. Dawk li bħali ivvotaw għall-isħubija ta’ Malta fl-Unjoni Ewropea għadhom ma nsewx lil Sant ixejjer il-vot tiegħu fuq is-Super One hu u jgħidilna li r-referendum intrebaħ mill-vapur tal-partner (il-Partnership).

Ma nsejniex lanqas li kien jgħidilna li l-Maltin fil-Parlament Ewropew se jkunu qed isaħħnu s-siġġu u li pajjiżna se jkun qisu makku f’ħalq balena. Kieku kelli noqgħod niftakar u nikkwota dak li kien jgħid Sant dwar l-Unjoni Ewropea ikolli bżonn il-kolonni u l-paġni kollha ta’ din il-gazzetta għal ġimgħa sħiħa.

Iżda nkunu qed nagħmlu żball u inġustizzja mal-istorja jekk inwaħħlu din il-politika żbaljata tal-Labour ma’ Alfred Sant biss.

Għax Sant dak iż-żmien ma kienx waħdu. Mhux hu biss ried icaħħadna milli nkunu parti mill-proġett Ewropew. Pereżempju niftakar lil ċertu Joseph Muscat jagħmel programm fuq is-Super One jismu 'Made in Brussels'. Dan il-programm kien kollu kemm hu propaganda kontra l-isħubija ta’ pajjiżna fl-Unjoni Ewropea. Apparti dan il-programm fuq it-televixin, Muscat kien ukoll jikteb regolarment fil-ġurnali. Niftakar li kien saħansitra kiteb f’ġurnal Iżlandiż biex iħeġġeġ lil dan il-poplu wkoll jibqa’ barra mill-Unjoni Ewropea. Imbagħad, malli dħalna fl-2004, Muscat sar Membru Parlamentari Ewropew.

Lanqas Muscat ma kien waħdu. Nista’ nsemmi pataflun ta’ ismijiet ta’ Ministri, Segretarji Parlamentari, kandidati u uffiċjali Laburisti li ħadmu biex pajjiżna jibqa’ barra mill-Unjoni Ewropea. Għalhekk għandna noqgħodu attenti li ma naqgħux fin-nassa li nwaħħlu kollox f’Sant. Tkun ħaġa komda ħafna għall-oħrajn li kienu (u għadhom) miegħu li jfarfru r-responsabbiltà kollha ta’ din il-politika żbaljata fuq persuna waħda.