“Smajt lil Silvio Scerri jordna t-tneħħija ta’ Norman Vella mill-PBS” – John Bundy

Minn maltarightnow.com

John Bundy ikkonferma bil-ġurament fil-Qorti li sema’ liċ-Chief of Staff fil-Ministeru tal-Intern u s-Sigurtà Nazzjonali Silvio Scerri jordna t-tneħħija ta’ Norman Vella mill-PBS. John Bundy kien qed jixhed quddiem il-Kummissjoni għall-Impjiegi f’kawża li l-eks preżentatur ta’ TVHemm fetaħ kontra l-Prim Ministru Joseph Muscat u l-Kap taċ-Ċivil Mario Cutajar. Fil-kawża, Vella qed jgħid li r-raġuni għat-tneħħija tiegħu mill-PBS kienet waħda politika.

Fix-xhieda tiegħu, Bundy qal li f’Mejju 2013 kien fil-Ministeru tal-Intern għal laqgħa privata ma’ Silvio Scerri. Qal li Silvio Scerri kien qed jitkellem fuq it-telefon ma’ xi ħadd jismu Anton. Skont Bundy, Silvio Scerri qal lil dan Anton biex ineħħi lil Norman Vella mill-istazzjon nazzjonali. Mistoqsi mill-Avukat Andrew Borg Cardona x’jismu l-Kap Eżekuttiv tal-PBS, Bundy wieġeb “Anton Attard”.

Xehdet ukoll il-preżentatriċi ta’ TVAM Norma Saliba, li qalet li hi impejgata tal-MUESAC u li ġiet sekondata mal-PBS f’Awwissu 2013, xahar wara li tneħħa Norman Vella. Hi kkonfermat li ma kien hemm ebda sejħa għall-applikazzjoni għall-impjieg tagħha. Saliba qalet li kien il-Kap tal-Aħbarijiet u l-Editur tal-PBS Reno Bugeja li ċemplilha u offrielha impjieg mal-istazzjon tal-istat.

Mistoqsija mill-Avukat Borg Cardona xi rwol kellha fil-kampanja elettorali tal-Partit Laburista, Saliba qalet li ma kellha ebda sehem. Madankollu, kkonfermat li ftit jiem qabel bdiet il-kampanja elettorali ħadet sehem f’reality show fuq l-istazzjon televiżiv tal-Partit Laburista biex jinġabru fondi għall-istazzjon. Ikkonfermat ukoll li l-partner tagħha Manuel Micallef kien kandidat tal-Partit Laburista fl-elezzjoni ġenerali li għaddiet. Saliba kkonfermat ukoll li fiż-żmien li Reno Bugeja offrielha impjieg fil-PBS, il-partner tagħha kien imexxi l-Kamra tal-Aħbarijiet tal-istazzjon Laburista.

Xehed ukoll iċ-Chairman mhux Eżekuttiv tal-PBS Tonio Portughese, li qal li Norman Vella kien ċempillu darbtejn biex ikun jaf x’kien għaddej fuqu. Portughese qal li kien talab informazzjoni u meta sar jaf li Norman Vella kien deployed miċ-Ċivil, ma ndaħalx aktar fil-kwistjoni. Portughese qal ukoll li hu qatt ma ġie kkonsultat minn ħadd dwar jekk riedx li Norman Vella jibqa’ jaħdem fil-PBS.