Air Show: Xi jgħidu l-Kunsilli u l-MPs?

Illum kellna inċident ieħor f’Air Show, din id-darba fiċ-Ċina.

Ma rridx nagħti l-impressjoni li kull meta se jkun hemm xi inċident se nkun qed nifraħ bih biex ningħata raġun għal dak li ktibt f’dan il-blog qabel l-Air Show ta’ Malta. Pero` rrid ngħid li fost min ikkummenta f’dan il-blog biex jiddefendi l-akrobaziji tal-ajruplani, kien hemm min qal li dawn ma jsirux fuq id-djar tan-nies. Din mhix għajr gidba faħxija.

Jien rajt l-akrobaziji tal-ajruplani mid-dar tiegħi u nista’ nixhed li rajthom jagħmlu dawn il-manuvri perikolużi fuq il-lokalitajiet tal-Qrendi, l-Imqabba, iż-Żurrieq, is-Siġġiewi, Ħal Safi, Ħal Kirkop, Ħal Luqa, Ħal Qormi, il-Gudja, Ħal Għaxaq u Birżebbuga. Jista’ jkun li kien hemm irħula oħra li wkoll tpoġġew f’dan ir-riskju inutli, pero` ladarba jien rajt dawn, fuq dawn nista’ nitkellem.

Issa jien ngħix f’waħda minn dawn il-lokalitajiet u ħadd ma talab il-permess tiegħi biex għall-orgażmu ta’ xi wħud indaħħal lili nnifsi, lill-familja u lill-propjeta` tiegħi f’riskju. M’għandix informazzjoni jekk dan l-eżerċizzju sarx mal-Kunsilli Lokali li jirrapreżentawna. Jekk dawn baxxew rashom għall-organizzaturi mingħajr ma semgħu x’għandhom xi jgħidu r-residenti żbaljaw u żbaljaw bil-goff.

Nistenna li issa nkun naf x’inhi l-pożizzjoni fuq l-akrobaziji tal-ajruplani fl-Air Show tas-Sindki u tal-Kunsilli Lokali ta’ dawn il-lokalitajiet u tad-Deputati Parlamentari tal-5 u tas-7 Distrett li milli rajt jien huma l-iktar żewġ distretti milqutin.

Qabel tibdew tikkummentaw bl-addoċċ, nisħaq li s-suġġett ta’ dan il-blog u ta’ din id-diskussjoni mhix l-Air Show fiha nfisha bħala attivita` imma l-akrobaziji u l-manuvri perikolużi bla bżonn ta’ ajruplani fuq postijiet abitati.