Minkejja li mhux possibbli li nħabbat kull bieb li hawn fil-gżejjer Maltin, kuljum qed inżur xi raħal jew belt u nagħmel ftit ‘door to door’. Kien privileġġ kbir nidħol f’ħafna minn dawn id-djar bit-televixin. Inħoss li huwa privileġġ ferm akbar li dak li jkun jiftaħlek u jistiednek tpoġġi bilqiegħda fuq is-sufan tiegħu.
Minkejja
d-differenzi fl-opinjoni li jista’ jkun hemm, nistqarr li dawk kollha li
fetħuli laqgħuni tajjeb ħafna, tkellmu miegħi b’onesta u semgħuni b’interess. Niskuża
ruħi li mhux dejjem stajt inkompli magħhom meta offrewli xi grokk. Kieku kelli
nixrob dak kollu li offrewli kien ikolli mmur lura d-dar b’taxi!
MA NIFHIMX
F’ħafna mid-djar
li nidħol fihom nitpaxxa nisma’ dwar it-tfal u n-neputijiet waqt li nkun qed
niġi muri sensiela ta’ ritratti mwaħħlin mal-ħitan jew poġġuti fuq xi biċċa
għamara. Hija għafsa ta’ qalb kbira meta l-istorja li jgħidulek ma tkunx dwar
xi tieġ, gradwazzjoni jew magħmudija imma tkun dwar mard jew saħansitra mewt.
Fil-Fgura ltqajt
ma’ koppja li snin ilu tilfu lill-uniku wild tagħhom b’inċident tat-traffiku.
Fil-Qrendi ltqajt ma’ omm li tilfet lil binha b’inċident f’kamra tan-nar. Il-ħarsa
ta’ dawn l-ommijiet huma u jirrakkontawli dak li għaddew minnu ma nista’ ninsiha
qatt.
Ma ninsiex lanqas
funeral ta’ tarbija ta’ sena u nofs li attendejt għalih ftit aktar minn ġimgħa
ilu. Qatt ma fhimt u x’aktarx qatt ma jien se jirnexxieli nifhem l-inġustizzja
ta’ ħajja daqstant qasira.
SAN PAWL
L-esperjenza ta’
kandidat tieħdok ukoll fil-festi. Biex ngħid kollox, għalija hija ħaġa normali
li nżur il-festi. Mhux għax jien xi dilettant tal-armar, tal-baned jew tal-logħob
tan-nar, imma sempliċiment għax l-ambjent tal-festa Maltija jogħġobni.
Bħal lum ġimgħa
mort għall-festa ta’ San Pawl fil-Belt Valletta. Il-paniġierku ta’ Dun Lawrenz Zammit spiċċa rrapportat fil-gazzetti kollha, l-aktar għall-pożizzjoni netta
li dan il-Kanonku ħa kontra l-proposta tal-liġi tal-unjoni ċivili.
Jagħmel tajjeb il-kleru
li jesprimi ruħu dwar is-soċjetà Maltija u l-iżvilupp tagħha. Ma naqbilx ma’
min jgħid li l-Knisja m’għandiex tindaħal fi kwistjonijiet ċivili.
Mill-banda
‘l oħra l-politiku m’għandu qatt jagħti widen biss għal dak li qed tgħid
istituzzjoni jew persuna waħda, iżda għandu jisma’ u jiżen dak li għandu xi
jgħid kulħadd.
BORG OLIVIER
Inzerta li fl-istess
ġurnata tal-paniġierku ta’ Dun Lawrenz, James Debono ippubblika fuq il-website
tal-Malta Today storja li ġrat ftit aktar minn 40 sena ilu.
Hu u jqalleb fid-dokumenti
tal-kabinett ta’ Ġorġ Borg Olivier, James sab li fl-1969 l-Arċisqof Mikiel
Gonzi kien talab lill-Gvern biex jgħaqqad skwadra speċjali ta’ pulizija biex
titħares il-moralita pubblika. Fost affarijiet oħra, l-Arċisqof ried li din
l-iskwadra tħarrek lil dawk in-nisa li jilbsu l-bikini fuq ix-xtut tagħna u lil
dawk il-koppji li jażżardaw joqgħodu jitgħannqu u jitbewwsu quddiem in-nies.
Illum din it-talba
tidher eżaġerazzjoni. Il-bikini sar xi ħaġa tal-bieraħ u ħadd m’għadu jieqaf
jistagħġeb jekk jinzertak titgħannaq jew titbewwes mal-maħbub/a tiegħek.
Għal uħud li qed
jaqraw dan l-artikolu dan l-istat ta’ fatt iqisuh bħala “rigress”. Għalija huwa
sempliċiment “stat ta’ fatt” li rridu ngħixu bih u miegħu, jogħġobna jew le. Politiku
tajjeb u rebbieħ huwa dak li jirnexxielu jantiċipa l-bżonnijiet tas-soċjetà ta’
għada u mhux dak li għadu jiġġieled il-kawża li ntilfet il-bieraħ.
REPORTER
F’San Pawl dehert ukoll fil-programm Reporter, fuq TVM. Proprjament dan
il-programm kien irrekordjat xi tliet ijiem qabel fil-bini l-ġdid tal-PBS
imsejjaħ ‘Creativity Hub’.
Kienet l-ewwel darba li dħalt f’dan il-bini
minn meta l-Gvern Laburista ta’ Joseph Muscat neħħieni f’Ġunju li għadda.
Grazzi għall-fiduċja li qed juri fija l-Partit Nazzjonalista, dawk li
mingħalihom kienu ħelsu minni kellhom jerġgħu jitqannew b’wiċċi u b’leħni fuq l-istazzjon
nazzjonali.
Tassew każ li l-bieb li għalaqli f'wiċċi Joseph Muscat reġa' fetaħuli beraħ Simon Busuttil.
No comments:
Post a Comment