Mallia huwa l-Ministru li taħtu jaqgħu l-Korp tal-Pulizija, l-Armata u s-Servizzi Sigrieti fost oħrajn. Żgur m’għandix għalfejn noqgħod nispjega x’informazzjoni kunfidenzjali u sensittiva għandhom aċċess għaliha dawn id-dipartimenti. Kulħadd jaf ukoll bil-poteri li dawn għandhom biex isiru jafu dwarek, dwari u dwarna lkoll.
Nistaqsi, Ministru li
ma ddejjaq xejn jissemma’ konverzazzjoni wara bieb fl-ogħla istituzzjoni
tal-pajjiż, tista’ tafdalu f’idejh it-tmexxija ta’ nies li għandhom aċċess għall-konverzazzjonijiet
li jkollna ta’ kuljum bit-telefowns u l-kompjuters tagħna?
GĦAMLET TAĦTHA
Jekk l-istorja
tal-Ministru Mallia kelli naqraha tlieta jew erbgħa darbiet biex nemmen li ma
kontx qed noħlomha, il-clip ta’ Justyne Caruana smajtha xi għoxrin darba biex
nipprova nifhem x’għamlet “taħtha” meta kienet fuq it-taxi ħelikopter tal-Armata.
Wara ħafna smiegħ,
ninsab konvint li lill-RTK Justyne qaltilhom li tant twerwret fuq il-ħelikopter
li bil-biża’ għamlet taħtha. Nittama għal dawk is-suldati li kienu fl-ajru ma’
Justyne li din il-biċċa tax-xogħol ma ġratx tassew u li din kienet biss
eżaġerazzjoni tad-Deputata Għawdxija.
Sakemm inneħħi d-dubju,
jekk xi darba ninzerta ngħabbi lil Justyne se noqgħod attent ħafna li ma
nbeżżahiex.
MILL-OPPOŻIZZJONI
Meta tkun qed
iddur id-djar tisma’ ħafna stejjer. Huwa stat ta’ fatt li għad hawn ħafna eks
votanti tal-Partit Nazzjonalista irrabjati għal affarijiet li ġraw meta
l-partit kien fil-Gvern.
Waħda li qed
nisma’ spiss hija li biex tinqeda u tieħu dak li bi dritt huwa tiegħek taħt
Gvern Nazzjonalista kien ikun iktar effettiv li tkellem ċertu Deputati u
Kandidati tal-Partit Laburista (dak iż-żmien fl-Oppożizzjoni) milli
lill-Ministri tal-Gvern. L-ismijiet ta’ ċertu deputati jispikkaw iktar minn
oħrajn f’dawn il-ġrajjiet. Jidher ċar li mill-Oppożizzjoni l-Partit Laburista kien
irnexxielu joħloq xibka ta’ klijenteliżmu f’diversi dipartimenti, awtoritajiet
u kumpaniji tal-gvern.
SANDRO
Din il-ġimgħa
smajna wkoll li l-iżviluppatur u president tal-iżviluppaturi Sandro Chetcuti qed
jagħmel xogħol volontarju għall-Partit Laburista.
Tgħid jekk Sandro jfettillu
jmur dawra bil-jott ma’ xi uffiċjal tal-Partit Laburista se jsib xi ġurnalist
tal-ONE jistennieh jasal bil-kamera u bil-mikrofonu?
MERITOKRAZIJA
It-Tlieta
filgħaxija kont mistieden niddiskuti l-meritokrazjia fil-programm Taħt il-Lenti
fuq NET TV. Kellna nkunu jiena, Arnold Cassola ta’ Alternattiva Demokratika u
kandidat jew rappreżentant tal-Partit Laburista. Iżda ġara li għal dan
il-programm il-Partit Laburista ma bagħat lil ħadd. Is-siġġu baqa’ vojt u
l-leħen Laburista baqa’ ma nstemax.
Possibbli minn
12-il kandidat għall-Parlament Ewropew, minn 22 Ministru u Segretarju
Parlamentari li jagħmlu l-ikbar kabinett fl-istorja, mill-uffiċjali kollha li
għandu l-Partit Laburista, ħadd ma kien jimmeritah jirrappreżenta l-Labour
f’dan il-programm? Jew forsi ħadd minn dawn ma jrid jidher jew jinstema’
jiddefendi kif mexa l-Gvern ta’ Joseph Muscat f’dawn l-għaxar xhur.
REX
Nhar l-Erbgħa erġajt dħalt il-Qorti. Kompla s-smiegħ tal-kawża li qed nagħmel kontra l-Prim
Ministru u l-Kap taċ-Ċivil li fiha qed insostni li fil-konfront tiegħi twettqet
diskriminazzjoni politika. Fost il-kummenti u l-messaġġi li wasluli laqatni l-aktar
dak tad-Deputat Nazzjonalista Mario Galea, li daħħal fl-istorja anke lill-kelb
tiegħu Rex.
Mario kiteb hekk “Kumbinazzjoni
il-file personali tax-xogħol ta’ Norman mar il-Ministeru ta' Manwel Mallia.
Kumbinazzjoni is-Segretarju Permanenti maħtur minn Joseph Muscat kellu ħafna
telefonati. Kumbinazzjoni l-Kummissarju Peter Paul Zammit maħtur mill-Prim
Ministru Muscat ried lil Norman lura jittimbra l-passaporti. Anki l-kelb tiegħi
Rex jaf li it-transfer ta' Norman ma kienx kumbinazzjoni iżda vendikazzjoni.”
No comments:
Post a Comment