Ajma xi ħruq

Fuq il-venda jafuni sewwa. Allura qed nistenna li dalwaqt jistaqsuni x’jaħraqni l-iktar… Il-kummenti razzisti fuq it-timesofmalta.com fuq il-protesta li qed issir bħalissa mill-immigranti ta’ Ħal Safi jew il-protesta nnifisha, bit-tfiegħ tal-ġebel u t-tkebbis tan-nar b’kollox?

It-tweġiba tiegħi lesta. Lili jaħarquni l-aktar il-kummenti ta’ dawk li dejjem japrofittaw ruħhom minn xi sitwazzjoni bħal din biex jinfexxu jirremettu l-mibgħeda lejn bnedmin oħra.

Fuq nota personali nixtieq navza lil dawk li xi kultant niltaqa` magħhom quddiem kikkra kafe` jew platt spaghetti li jekk ikun bi ħsiebhom joqogħdu jgħiduli kemm ma jaħmlux lil dawn is-suwed, jien immedjatament se nqum u bla kliem u bla sliem se nitlaq l’hemm. Eh… u jekk inkunu diġa ordnajna, il-kont f’idejkom.

Intant, nawgura lill-forzi tal-ordni li bħalissa qed jaqdu dmirhom f’isimna f’Ħal Safi biex mill-aktar fis jirnexxielhom iġibu s-sitwazzjoni għan-normal mingħajr ħadd ma jweġġa għalxejn.