Jekk jirreżenja Edgar irid jirreżenja George Abela

Fuq il-venda llum kulħadd deher iktar kuntent mis-soltu. Ħsibt li ġara xi miraklu u li l-Arriva waqfet tagħmel il-bużullotti, imma ma kienx il-każ. Allura staqsejt l-għaliex dan il-ferħ kollu u qaluli li kienu qed jgħoxew bis-sentenza mgħotija mill-Qorti liż-żewġ saċerdoti li nstabu ħatja ta’ abbuż.

Ta’ iffissat li jien xorta pruvajt naqbadha ftit fuq dan Edgar l-assistent ta’ Gonzi u fuq għandux jirreżenja jew le, imma ħadd ma ta kasi. Kulħadd fil-fathers kien moħħu. Allura ġejt ninfexx hawn.

Għax jien ma nistax nifhem kif dawk li qed jgħidu li Edgar għandu jdabbar rasu, ma lissnux kelma meta George Abela l-President għamel bħalu. U mhux talli lill-President ma qalulux biex jirreżenja, talli bilkemm ma bdewx jiġbru biex jagħmlulu monument biex jirringrazzjawh tal-intervent tiegħu. Issa jekk illum tridu taqraw biss fuq l-abbużati, xorta komplu aqraw, għax anke f’din l-istorja jidħlu.

Mela, l-istorja hija li f’April 2010 il-President iltaqa’ ma’ sitt irġiel li dak iż-żmien kienu għadhom fl-istadju li ‘qed jalleggaw’ abbuż minn tliet saċerdoti li suppost kienu qed jieħdu ħsieb it-trobbija tagħhom. U l-President wiegħed lill-irġiel li se jara l-għaliex il-każ tagħhom kien qed jittawwal. Jekk din l-istorja nsejta jew lili ma temminnix klikkja hawn.

X’ġara wara din il-laqgħa fil-Palazz jien ma nafx. Il-possibiltajiet huma tnejn. Jew il-President tnejjek bihom u m’għamel xejn, jew biex ra dak li wiegħed li se jara, ċempel lil xi ħadd u staqsa x’kien qed jiġri. L-istess kif għamel Edgar meta Cyrus Engerer qallu li qed jissuspetta li l-każ ta’ missieru mhux għajr konġura politika.

Allura min illum qed jgħid li Edgar dineb għax indaħal fejn ma jesgħux jew għax b’xi mod prova jinfluwenza l-andament tal-ġustizzja, ma jistax jabdika milli jgħid li l-President George Abela għamel l-istess dnub meta wiegħed l-interessament tiegħu fil-każ tal-abbużati. Il-konsistenza tiddetta li jekk tgħid li għandu jirreżenja wieħed, għandek titlob ukoll ir-riżenja tal-ieħor.

Biex ħadd ma jifhimni ħażin jew ipoġġili kliem f’ħalqi se ngħidilkom li għalija l-President m’għamel xejn ħażin. Għamel sewwa daqs kemm għamel sewwa Edgar. U la t-tnejn għamlu s-sewwa, għalija jistgħu jibqgħu f’posthom u jistgħu ikomplu jeżiġu li l-ġustizzja ssir u li ssir b’ġustizzja.

Imma trid tkun ipokrita u pulċinell biex tgħid lil Gonzi jeħles minn Edgar fl-istess ġimgħa li tmur taqta’ l-biljetti għall-August Moon Ball biex tgħaddi serata tiżfen, u forsi tikser xi sieq, fil-kumpanija tas-Sinjuri Abela.