Cyrus ta’ Troja

Mela darba kien hemm wieħed Laburist anzjan li kien wasal fl-aħħar nifsijiet ta’ ħajtu.

Uliedu kienu miġburin kollha ħdejn soddtu għax riedu jkunu hemm x’ħin l-għażiż missierhom iħalli din id-dinja. Ħin minhom dan l-anzjan għamlilhom talba stramba.

Talabhom imorru l-Istamperija biex jagħmlulu tessera mal-Partit Nazzjonalista. Uliedu ħasbuh qed jewden u staqsewh l-għaliex wara għomor mal-ħomor propju issa li wasal fl-aħħar irid jingħaqad mal-blu. Weġibhom “Biex malli mmut ikun miet wieħed minn tagħhom.”

Din iċ-ċajta smajtha kemm-il darba fuq il-venda. Din il-ġimgħa reġgħu qaluhieli, imma din id-darba bis-serjeta`. Ħarġu bit-teorija li din l-istorja li Cyrus li telaq lill-PN biex mar mal-PL mhix għajr pjan maħdum min-Nazzjonalisti biex malli dan Cyrus jitressaq il-Qorti, fuq in-NET ikunu jistgħu jgħidu li tressaq wieħed minn tagħhom.

Qisu Cyrus xi żiemel ta’ Troja, mibgħut fil-palazz ta’ Joseph Muscat biex itappanlu l-ħġieġ.

Imbagħad kien hemm wieħed li qal li din ta’ Cyrus la għandha x’taqsam ma’ kif ivvota Gonzi fuq id-divorzju u lanqas mal-każ li għandu pendenti mal-ġustizzja. “Tort tal-Arriva” qalilna.

Skont din it-teorija Cyrus mar iġġieled ġlieda tajba ma’ ta’ GonziPN f’Tal-Pieta`. Wara li sfoga u rriżenja mar fuq l-istage tal-Arriva, imma bħas-soltu l-Arriva ma ġietx. Allura dan Cyrus telaq bil-pass u hu u tiela ‘l fuq ġie ħdejn il-kwartieri tal-Labour. Peress illi kien għarqan ilma Cyrus daħal ftit għall-aircondition. Din it-teorija tagħlaq b’din il-battuta “Hu mar għall-frisk u lilhom irranġhom għall-frisk.”

Ovvjament lil sħabi tal-venda li ħarġu b’dawn il-ħrejjef ħadthom bin-nejk. Kieku għamilt mod ieħor kien ikolli mmur inkellem psikjatra. Allura ma stajtx ma nieħux l-istess atitudni meta smajt u qrajt it-teoriji ta’ kumplott li qed joħorġu bihom tal-One News u tal-Malta Today f’dawn il-ġranet. Allajbierek kemm huma kreativvi u kemm jafu jdaħħku. Imn’alla jkunu huma biex infaqqgħu xi żewġ daħkiet waqt il-BBQ tal-każin tal-banda.

Bilħaqq, innutajtu li fis-sajf Malti imn’alla jkunu l-kunsilliera Slimiżi biex ikollna fuq xiex ngħaddu siegħa? Mela s-sajf l-ieħor kellna lis-Sindku li la baqa’ Sindku u lanqas Nazzjonalist u das-sajf għandna lil Cyrus ta’ Troja. U la Cyrus u Nikki t-tnejn baqgħu fil-Kunsill Slimiż, nissuġġerilhom jipproponu biex fil-monument ta’ Triq Bizazza idaħħlu xi żewġ kummidjanti oħra minn fost dawk li issa saru ħbieb tagħhom sewwa. Imbagħad jistgħu jorganizzaw kompetizzjoni għal min jirnexxielu jtajjrilhom rashom l-ewwel. Naf ħafna nies li lesti joqgħodu fil-kju biex jieħdu sehem.