Qed tara kif qalulu!

Fil-blog li ktibt jumejn ilu fuq ir-riżenja ta’ Cyrus Engerer mill-PN u s-sħubija immedjata tiegħu fil-PL, jien għidt “għandi nifhem li Cyrus huwa l-uniku wieħed f’Malta li jaf x’se jkun qed jagħmel il-Partit Laburista jekk jirbaħ l-elezzjoni li ġejja.”

Balleċ kelli raġun!

Dalgħodu fis-Sunday Times Cyrus Engerer ġie kwotat hekk: “In this past week I have met and learnt what Labour is planning and I really feel comfortable with it.”

Biex ngħidu kollox Cyrus qal ukoll li ma jaqbilx li l-leader il-ġdid tiegħu iżomm sieket fuq il-pjanijiet li għandu għalina. Fuq il-venda kien hemm wieħed Laburist għal naqra weħillu pastizz tal-piżelli hu u jaqra x’qal Cyrus. Smajtu jgħid “Madonna, x’biċċa nkwiet fih dan Cyrus… għadu ġej u ġa mar iparla kontra Joseph tagħna! Aħjar baqa ma’ GonziPN. Kont nieħu gost tant narahom jitqattgħu bejniethom!”

Insomma, jaqbel u ma jaqbilx, is-sigrieti tal-Mile-End Cyrus żammhom bejnu u bejn il-ħabib il-ġdid tiegħu Joseph Muscat, l-istess wieħed li ma jridx li nies bħal Cyrus jiżżewġu ma jmurx imbagħad ikollhom iċ-ċans li jaddottaw it-tfal.

Lil tat-Times Cyrus qallhom ukoll li Pawlu Borg Olivier tal-PN qallu biex jirreżenja mill-Kunsill ta’ Tas-Sliema. Fuq il-venda l’hena tagħhom jiddieħku b’dan Pawlu u biex idaħħluni fil-kredu staqsewni jekk naqbilx ma’ Pawlu li Cyrus għandu jirreżenja. Malajr neħħejtilhom id-daħka minn fuq wiċċhom x’ħin lissint “Mela jżabbab!”

Mela jekk Lawrence Gonzi kellu jivvota IVA fil-Parlament jew iwarrab (kliem Cyrus) għax 53% tal-poplu fir-referendum qal IVA, x’għandu aħjar minnu Cyrus Engerer li 100% tan-nies li tawh siġġu fil-Kunsill għamlu hekk għax ikkontesta l-elezzjoni taħt l-arma kera seba’ pesti tal-PN?

Imma kemm ilu ma’ tal-Labour Cyrus qed isir jixbħu wisq lil Joseph Muscat. Dak li jgħodd għal ħaddieħor ma jgħoddx għalina - din hi l-filosofija tal-ġenerazzjoni l-ġdida ta’ Muscat.

Minkejja li jien xbajt ngħid li ma naqbilx fuq kif ivvota l-Prim Ministru fuq il-liġi tad-divorzju, ma ninsiex li fl-ewwel ta’ Mejju (qabel ir-referendum) Joseph Muscat qal ċar u tond li jekk il-poplu jgħid LE, hu se jibqa’ jgħid IVA, anke jekk jibqa’ waħdu. Joseph dakinhar qisu ried iserraħ moħħ il-progressivi li jekk did-darba jirbaħ il-LE (ħaġa li ma ġratx), la jsir Prim Ministru hu kien se jiġi jitnejjek mir-rieda tal-poplu u kien jivvinta xi Private Member's Bill jew xi referendum ieħor.

Allura l-loġika progressiva tinqara hekk: Joseph jista’ jibqa’ waħdu u jiġi jitnejjek minn kulħadd, Cyrus jista’ jibqa kunsillier, imma l-oħrajn ma jistgħu jagħmlu xejn hlief dak li jgħidulhom biex jagħmlu Joseph & co.

Issa ħa nitkellmu daqsxejn fuq din tal-gays ukoll. Għax Cyrus lil tat-Times qalilhom li lanqas fuq din ma jaqbel ma’ Joseph il-leader moderat. Imma Joseph mhux Lawrence. Lil Joseph, Cyrus se jtih ftit ċans. Lit-Times qalilhom “Joseph Muscat, like many others, has his opinion and it doesn’t mean that opinions don’t change.”

Allura Sur Engerer, dak li urewk fil-palazz tal-ħġieġ - dak li qalulek li se jagħmlu u żammejtu għalik - mhux bilfors huwa dak li tassew se jagħmlu jekk ikollhom il-poter? Ħeqq, opinions change hux!