Problemi bil-bajd

Din tal-bajd jidher li hija kobba ohra mhabbla sew ghall-Gvern Nazzjonalista. M’iniex qed nitkellem fuq il-bajd li jinzammu ghas-shana tal-qalziet u lanqas fuq il-bajd tal-frejjeg. Qed nghid ghall-bajd tal-flieles umani u fuq id-dilemmi kbar li qed iqallbu l-imhuh tal-politici taghna fil-kwisjoni tal-IVF.

Fuq il-venda ma tantx sibt ma’ min niddiskuti din l-issue. Meta ttantajt inqajjem is-suggett kulhadd baqa’ jhares lejja qisni kont qed nitkellem fuq l-aljeni. Spjegajtilhom li din tal-IVF mhix ghajr teknologija li tghin lil dawk il-koppji li ghal xi raguni jew ohra ma jirnexxilhom jaghmlu l-ulied minn fuq is-sodda, isiru genituri.

Din tal-IVF tintuza fid-dinja kollha u f’Malta ilha ssir xi ghoxrin sena fl-isptar ta’ Josie ta’ San Gakbu. Kien hemm wiehed qalli li la ilha ssir daqshekk jaf l-gharus tat-tifla tieghu huwa wiehed minn dawk li saru fil-laboratorju ta’ Haz Zabbar. Iehor staqsieni l-ghaliex la l-IVF ilha ssir minn zmien Fenech Adami Prim Ministru, din qed tqum fil-Parlament propju issa. Ghidtlu l-verita` - li ghal dawn is-snin kollha hadd m’ghaddielu minn mohhu jikteb ligi li tirregola l-bicca xoghol kollha.

Is-sitwazzjoni bhalissa hi li sakemm tghaddi l-ligi, l-isptar privat ta’ Josie jista’ jibqa’ ghaddej jaghmel l-IVF kif ghamel sal-lum b’etika li mpona fuqu nnifsu, imma fl-isptar state of the art tal-Gvern ma jista’ jsir xejn. Allura qeghdin f’sitwazzjoni fejn min ghandu xi ftit soldi taht rasu jista’ jiehu cans biex jirriproduci ruhu u min m’ghandux ikollu jibqa’ minghajr childrens’ allowance.

Lura fil-kumitati tal-Parlament, jidher li din tal-IVF fiha hafna dilemmi u problemi ta’ kuxjenza. Kemm se npoggu bajd taht it-tigiega? Ghandna niffrizaw il-bajd biss jew il-bajd bil-flieles b’kollox? B’dawn id-domandi u b’hafna ohrajn itaqqlu l-imhuh tal-Parlamentari taghna fid-dell tal-pozizzjoni kontra l-IVF tal-Knisja Kattolika, il-Mater Dei jidher li ghad baqalu ftit mhux hazin biex jibda jghin fil-holqien ta’ trabi li minghajr din it-teknologija ma jkunu fostna qatt.

U hawn hu l-punt kollu. Iktar ma ndumu nparlaw, niddiskutu u nqallbu fl-enciklici, iktar qed intellfu genituri potenzjali milli jsiru genituri. Kull ciklu li jghaddi minn fuq dawn in-nisa jfisser opportunita` ohra mitlufa li jitwieled Malti iehor jew ohra. U jekk ikomplu jgerrbu s-snin u c-cikli jieqfu, addio maghmudija u quccija.

Fuq il-venda kulhadd jitkaza u jqarras wiccu bl-ikrah meta xi hadd ifettilu jzerzaq kelma favur l-abort wara l-koncepiment, u nghid ghalija, bir-ragun. Pero’ din l-istennija li tittiehed decizjoni politika dwar l-IVF mhix ghajr forma ta’ abort qabel il-koncepiment impost mill-istat fuq dawn il-koppji.

L-istramba f’dan kollu hi li l-Gvern Nazzjonalista ta’ Lawrence Gonzi ma ddejjaq xejn jinvesti l-miljuni fit-teknologija tal-IVF ferm qabel ma ra li jholl il-kobba tal-iktar kelma popolari fil-politika tal-lum - il-kuxjenza. Il-kultura li l-ewwel ninvestu u nhallsu imbaghad naraw, naraha bhala kankru politiku. Imn’alla beda jinbena sptar gdid tal-onkologija bieb u ghatba mal-laboratorji tal-IVF state of the art tal-Mater Dei li minflok ghall-bajd tal-bnedmin qed jintuzaw biss ghall-bajd tad-dubbien.