Qalulu x’se jagħmlu?

Għadni kif smajt li Cyrus Engerer m’għadux il-Viċi Sindku Nazzjonalista tas-Slimiżi għax iddeċieda li ma jibqax man-Nazzjonalisti. Ngħid id-dritt, din l-aħbar ma ħadtiex b’sorpriża. Lil Cyrus inzertajt nafu ftit u ilni li ndunajt li r-‘Religio et Patria’ ta’ Gonzi mhix id-diska favorita tiegħu. Ngħid is-sewwa, naf bosta oħrajn li jaħsbuha bħalu fi ħdan il-PN u ma nistagħġeb xejn li nara xi tnejn oħra jiktbu xi artiklu, xi blog jew xi kumment fuq il-Facebook biex jippruvaw iżommu t-twieqi ta’ Joe Friggieri miftuħin għall-arja friska. Imma kont sorpriż mhux ftit meta komplejt nisma’ u qaluli li Cyrus issieheb ma’ Joseph, Anglu, Toni u l-ħomor l-oħra tal-palazz tal-ħġieġ.

Bqajt imbellaħ għax naf li Cyrus Engerer mhux xi ċuċ. Anzi, huwa persuna intelligenti u ta’ valida` kbira. Kont u għadni nara fih nifs ġdid għall-politika Maltija iktar mill-Parlament il-ġdid ta’ Piano. Fhimt u qbilt mad-diżappunt tiegħu bil-vot fil-Parlament tal-Prim Ministru fuq il-Liġi tad-Divorzju. Lanqas ma ddejjaqt naqra r-reazzjoni tiegħu. Kif stajt niddejjaq meta jien stess tkellimt bħalu fuq it-televixin u ktibt fuq dan il-blog u fil-gazzetta?

Imma li Cyrus jitlaq minn partit u ftit minuti wara jissieħeb mal-partit oppost ma stennejtiex u ma fhimtiex. Għax li tissieheb ma’ partit mhix decizjoni li normalment tieħu fi ftit minuti. Speċjalment jekk tkun ġej minn naha ‘l oħra tax-xmara. Ix-xmara tal-politika mhix il-fliegu ta’ bejn Malta u Għawdex li tista’ taqsmu kull tliet kwarti. La darba taqsam ix-xmara politika, x’aktarx tkun ħadt deċiżjoni li tibqa’ miegħek sal-qabar.

Ma stennejtiex għax naf li Cyrus mhux wieħed li jaqta’ qalbu malajr. Lil Cyrus kont qed nistennieh ikun wieħed mill-katalisti fil-bidliet li fiż-żmien li gej, irid u ma jridx, se jkollu jgħaddi minnhom il-Partit Nazzjonalista. La ddeċieda li jirreżenja, minn Cyrus kont nistenna li joqgħod barra ghall-arja jistenna l-bieb ta’ dak li llum qed jara bħala habs, jinfetaħ biex jidħol. Minflok, Cyrus għazel li jissakkar f’ħabs ġdid li forsi bħalissa qed jara isbah. Ħabib tiegħi li jkun fuq il-venda darba qalli li l-ħabiba tixjieħ iktar malajr minn kemm tixjieħ il-mara.

Ma stennejtiex għax mhux normali li xi ħadd jissieheb attivament f’partit politiku bi protesta kontra l-partit l-ieħor.

Mhix normali lanqas li xi ħadd jidħol f’partit minħabba issue waħda. Allura għandi nifhem li Cyrus jinsab komdu fil-Partit Laburista mhux biss minħabba l-issue tal-vot Parlamentari fuq il-Liġi tad-Divorzju imma wkoll fuq dak li se jkun qed jagħmel Gvern Laburista prospettiv fuq issues oħrajn.

Allura għandi nifhem li Cyrus huwa l-uniku wieħed f’Malta li jaf x’se jkun qed jagħmel il-Partit Laburista jekk jirbaħ l-elezzjoni li ġejja. Lill-oħrajn, lilna n-nies komuni, Dr Muscat qalilna ċar u tond li se jkollna nistennew sal-kampanja elettorali biex iżerżqilna xi ftit informazzjoni.