Dawk li se jorgażmaw bil-qassisin

Qabel xi ħadd jakkużani li qed niċċirkola l-pornografija u jkolli mmur infittex kenn politiku, nistqarr li r-ritratt li qed jakkumpanja dan l-artiklu mhux għajr monument li jinsab fil-belt Ewropea ta’ Amsterdam. Dawk il-konservattivi tal-Eurotours xebgħu jieħdu Kattoliċissimi jippassiġġaw ħdejn din l-opra. La l-kuxjenza ta’ dawn baqgħet mhix nittiefsa b’din il-viżjoni, m’għandux ikollna nkwiet nittawlulu ftit aħna wkoll. Imma nsomma, dan l-artiklu mhux dwar iż-ż____ Olandiż u lanqas mhu dwar il-kopja kulurita tiegħu li għandna f’Ħal Luqa.

Meta qed nikteb (fil-lejl ta’ bejn is-Sibt u l-Ħadd) għadni kif rajt reklam fuq il-website tat-Times jgħid li għada l-Ħadd se jxandru intervista mal-uniku tifel (illum adult) li ġie stuprat minn wieħed minn dawk il-qassisin li din il-ġimgħa nstabu ħatja ta’ abbuż. Skont dan ir-reklam, jidher li se jkollna too much details. Issa jekk tgħiduli li din mhix tixrid ta’ pornografija bi protagonisti minorenni, jien nista’ nibda ngħid li għandi wieħed daqs tal-Olanda.

Għax il-pornografija ma tiġix biss f’forma ta’ filmati. L-illustrazzjonijiet bil-kitba ukoll jistgħu ikunu forma ta’ pornografija. Intervista bħal dik li se jkollna għada mhix għajr kitba li se tistimula l-imħuħ jimmaġinaw dak li ġara bejn adult u tfajjel innoċenti. Din l-intervista mhix se tkun għajr spettaklu moqżież imħejji għal pubbliku li l-ewwel se jogħxa jarah, imbagħad se jirrakkontah, wara se jitkaża bih u fl-aħħar se jarmieh.

Dawk li għada, wara li jibilgħu l-ostja tal-Ħadd, se jintefgħu fuq il-bank tal-venda jixtarru d-dettalji ta’ din l-istorja se jkunu biss qed jaqtgħu għatx li x’aktarx lanqas huma konxji li għandhom. Dak li se jwassalhom jixtru s-Sunday Times u jaqraw din l-intervista mhux għajr l-istint tal-kurżita` morbuża li lkoll għandna jħabbat b’mod salvaġġ ġewwa fina.

Irridu nidħlu fl-istitut. Irridu nidħlu fil-kamra tas-sodda. Irridu naraw x’kien liebes u x’kellu mikxuf. Irridu nkunu nafu fejn poġġa jdejh. Irridu nkunu nafu x’ħin kellhom x’jaqsmu. Irridu nkunu nafu x’għamel wara li orgażma. Imbagħad inkunu straħna. Imbagħad inkunu nistgħu naħslu jdejna mill-inka u npoġġu mal-mejda għal biċċtejn fenek u ftit patata l-forn qisu għadna ġejjin minn film ta’ Harry Potter.

Nammettu jew le, il-verita` hi li min se jaqra sal-inqas fullstop se jkun qed jieħu gost. Wara li jorgażma l-ewwel darba mal-qari se jkun qed jieħu gost jistaqsi “Rajtha t-Times dalgħodu?” Jekk jgħidulu “Le” se jerġa jieħu gost għax se jkollu l-opportunita` jirrakkonta hu dak li qara, bit-tiżjin kollu li jkun immaġina between the lines. U hemm jerġa’ jorgażma.

Wara se jitkaża b’dak li jkun qara u rrakkonta. Se jikkummenta li s-sentenza li ingħatat lil dawn il-qassisin mhix għajr peanuts u jerġa’ jorgażma. L-aktar li se jieħdu gost f’din l-orġja medjatika se jkunu dawk li bis-Sunday Times f’idejhom se jgħidulna li jmissna nagħmlu bħall-Ingliżi u nibdew niġbru l-firem biex f’pajjiżna nerġgħu indaħħlu l-piena tal-mewt.

Huwa veru li kieku ma kinetx il-media jista’ jkun li dan il-każ kien jibqa’ mistur bil-periklu li jseħħu iktar minn dawn l-abbużi. Tassew li mn’alla kien Lou Bondi biex inkixef l-għatu ta’ din il-borma. Imma minn dakinhar sal-lum il-minestra li kien hemm fil-borma saret, inqalbet, ittieklet, għaddiet għall-katusi tad-drenaġġ u spiċċat tgħum fil-baħar.

Jekk hemm borom oħra x’jinkixfu ejja nikxfuhom. Mhux b’sens ta’ spettaklu, mhux biex inbiegħu iktar gazzetti, imma biex issir ġustizzja. F’dan il-każ il-ġustizzja saret. Allura s-separju jista’ jinżel. Dan il-film bi tfal u qassisin fuq sodda f’istitut ma rridx nerġa narah għall-gost.