Għaddietlu l-electoral fatigue...

L-electoral fatigue li skont il-Prim Ministru tant kienet ħakmet lill-poplu ta' dawn il-gżejjer li minħabba fiha kien se jkollu jħassar l-elezzjonijiet tal-Kunsilli Lokali, issa għaddiet.

Jidher li tant irkuprajna tajjeb minn din l-electoral fatigue li llejla l-Prim Ministru ħolom li jagħmlilna Referendum fuq il-bridge bejn Malta u Għawdex.

Kull min għandu għajnejh f'wiċċu qed jinduna li dan mhux għajr tentattiv iddisprat tal-Prim Ministru biex jaljena lin-nies mill-problemi kbar li għandu fil-Kabinett tal-Ministri.

Ikklikkja hawn għar-rapport sħiħ ta' TIMESOFMALTA.COM

Silvio Scerri jiddiskuti l-programmi ta’ TVM mal-Kap Eżekuttiv tal-PBS Anton Attard

Minn MALTARIGHTNOW.COM

Il-Kap Eżekuttiv tal-PBS Anton Attard qal fil-Qorti li ċ-Chief of Staff fil-Ministeru tal-Intern Silvio Scerri spiss ikellmu u jiddiskuti miegħu dwar il-preżentaturi u l-programmi li jixxandru fuq l-istazzjon nazzjonali TVM. Anton Attard qal fi żmien Gvern Nazzjonalista qatt ma kien jiddiskuti l-programmi maċ-Chief of Staff tal-Ministru responsabbli mix-xandir. Huwa ġġustifika dawn id-diskussjonijiet billi qal li Scerri “jifhem fil-medium”.

Attard kien qed jixhed quddiem il-Kummissjoni għall-Impjiegi fil-kawża tal-eks preżentatur ta’ TVHemm Norman Vella kontra l-Prim Ministru u l-Kap tac-Civil. Fil-kawża Vella qed jallega li t-tneħħija tiegħu mill-PBS kienet deċizjoni politika.

Fix-xhieda tiegħu Attard qal li f’Mejju 2013 is-Segretarju Permanenti fil-Ministeru ta’ Manwel Mallia kitiblu biex jistaqsieh meta kienet se tispiċċa l-iskeda ta’ TVHemm. Ftit ġranet wara, l-istess Segretarju Permanenti talab lill-Kap taċ-Ċivil ineħħi lil Norman Vella mill-PBS għax qal li kien hemm bżonnu fid-Dipartiment tal-Immigrazzjoni fl-ajruport.

JPO qed iqarraq

Araw ftit x'qed jgħid Jeffrey Pullicino Orlando lill-ħbieb tiegħu fuq Facebook.
 

Dawk li qed jagħmlulu LIKE tajjeb ikunu jafu li JPO qed iqarraq bihom.

Il-fatti huma li l-iskandlu tax-xiri taż-żejt inkixef f'Jannar 2013, waqt l-aħħar kampanja elettorali, meta Austin Gatt ma kienx għadu Ministru u ma kienx lanqas kandidat. Għaldaqstant ma kellux kariga politika minn xiex jirriżenja.

Fatt ieħor huwa li qabel inkixef dan l-iskandlu Tancred Tabone ma kienx biss "il-kuġin ta' Austin Gatt" imma kien rispettat minn kulħadd, tant li kien saħansitra nħatar President tal-Kamra tal-Kummerċ.

Anke Joseph Muscat kien jirrispetta lil Tabone. Kif jidher f'dawn ir-ritratti Muscat ma kien jiddejjaq xejn jiltaqa' miegħu, minkejja li kien "il-kuġin ta' Austin Gatt". Dawn ir-ritratti ttieħdu ferm wara li Tancred Tabone spiċċa minn Chairman tal-Enemalta fl-2005.

Kompetizzjoni bla premju

Min qal dan il-kliem?

"Where is the transparency in the way certain people in office perform their public duties? We now have a system where nobody is accountable for anything, and to add insult to injury - and this is becoming more obvious - that such persons who were or are not acting correctly in their public lives, are defended by the higher posts."

Għat-tweġiba ikklikkja HAWN.

Joseph Muscat ineħħi l-Ministru tal-Intern

Kien it-30 ta’ Mejju ta’ sentejn ilu. L-Oppożizzjoni pożittiva mmexxija minn Joseph Muscat ressqet vot ta’ sfiduċja fil-Ministru tal-Intern ta’ dak iż-żmien, Carm Mifsud Bonnici.

Il-mozzjoni għaddiet, kif kien mistenni, bi Franco Debono jivvota mal-Labour biex itir il-Ministru.

Dakinhar Muscat ma ddejjaq xejn ikun prosekutur, ġurat u ġudikant. Dakinhar ma saqsiex għall-parir ta’ xi mħallef bil-pensjoni.

U bejn l-argumenti (jew l-iskużi) li nġiebu dakinhar biex jitneħħa Mifsud Bonnici u l-istejjer tal-Ministru tal-Intern tal-lum hemm jaqsam baħar daqs il-fliegu ta’ bejn Malta u Għawdex bil-bridge taċ-Ċiniżi b’kollox.

Terremot fil-Kabinett tal-Ministri

Il-Prim Ministru mhux daqshekk ċuċ li ma jafx li l-pożizzjoni tal-Ministru Manuel Mallia m’għadhiex tenibbli.

Imma l-Prim Ministru jaf ukoll li Mallia mhux l-uniku problema li għandu fil-Kabinett tal-Ministri.

Biżżejjed ngħid li fil-ġranet u fil-ġimgħat li ġejjin fil-Qrati se nkunu qed nisimgħu ħafna dwar x’ħawwdu fil-borma ta’ żewġ kuntratti miljunarji l-Ministri Chris Cardona (liċenzja għal casino) u Joe Mizzi (trasport pubbliku).

U biex tkompli tgħaxxaqha, bħal-lum ġimgħa jaħbat l-aħħar jum ta’ Novembru - id-deadline li ntrabat bih il-Ministru Konrad Mizzi biex jgħidilna x’se jkun qed jiġri mill-proġett tal-power station tal-gass li diġà’ ta majnata tajba lill-kredibbiltà tal-Gvern ta’ Muscat.

Hello... għadni kif sparajt xi żewġ tiri

Ir-raġel fiċ-ċirku aħmar għadu kemm spara tiri lejn karozza li fiha kien hemm persuna. Minflok arrestaw lilu, il-Pulizija arrestaw lil dak li kien fil-karozza li qalgħet it-tiri.

Lil dan li spara m'arrestawhx. Ħallewh fil-libertà jagħmel li jrid. Jista' jkun li lanqas l-arma ma ħadulu. Saħansitra ħallewh iċempel lil min irid. Sal-lum għadna ma nafux ma' min tkellem dan ir-raġel f'dak il-ħin. Iżda nafu li ftit sigħat wara, il-verżjoni tiegħu ta' kif ġraw l-affarijiet (gidba) saret il-verżjoni uffiċjali tal-Ministeru tal-Intern u ġiet ippubblikata bħala stqarrija tad-Dipartiment tal-Informazzjoni.

Dan ir-raġel huwa persuna ta' fiduċja tal-Ministru tal-Intern, huwa x-xufier u s-security tiegħu u huwa wkoll Kuntistabbli tal-Pulizija. Fil-ħin li spara, kien qiegħed bil-karozza tal-Ministru.

Il-Prim Ministru tagħna qed jgħid li għandu bżonn inkjesta minn 3 maġistrati rtirati biex jiddeċiedi jekk għandiex tinġarr ir-responsabbiltà politika għal dan il-każ.

Niftakar żmien meta dan l-istess Prim Ministru ma kien jistenna l-ebda maġistrat biex jiddeċiedi x’inhu u x’mhuwiex skandlu u min għandu jirreżenja jew jitneħħa. Imma dak iż-żmien Joseph Muscat ma kienx għadu sar Prim Ministru.

PS: Anzi m'arrestawx lil min ġibed dan ir-ritratt ukoll!