Il-konsistenza ta’ Gino Cauchi

Kont bi ħsiebni nżerżaq żewġ linji fuq kemm hu ipokrita` l-Membru Parlamentari Laburista Gino Cauchi imma f’wiċċi se jibqa’. Se jkolli nagħlaq ħalqi u nibla kollox.

Bil-libsa ta’ shadow minister Laburista għax-xandir Gino Cauchi bħalissa qed imexxi kampanja kontra dawk li jippreżentaw xi programm ta’ ġrajjiet kurrenti fuq l-istazzjon tal-istat u għandhom l-ardir jistqarru pubblikament l-opinjonijiet politiċi tagħhom. Tgħidx kemm tkaża Gino għax Lou Bondi stqarr li Joseph Muscat għadu ma kkonvinċiehx biżżejjed u jekk issir elezzjoni għada jivvota lill-PN. Tant ħadha bi kbira dan Gino li sejjaħ press conference u talab l-intervent tal-Awtorita` tax-Xandir.

Issa jien niftakar li Gino Cauchi kien jaħdem għal snin twal bħala ġurnalist u preżentatur tal-aħbarijiet ta’ TVM. Fl-istess żmien li Gino kellu dan il-job huwa kien ħareġ għall-elezzjoni tal-Kunsill Lokali ta’ Pembroke, kien ġie elett u kien saħansitra ntgħażel minn sħabu l-kunsilliera biex ikun is-Sindku.

B’dan f’moħħi ġejt niġri nikteb kemm hu vili dan Gino Cauchi. Kont se ngħid li dan Cauchi vera m’għandux żejt f’wiċċu biex jitkaża b’Bondi għax qal lil min se jivvota, meta fiż-żmien li hu kien parti mill-kamra tal-aħbarijiet ta’ TVM kien qed jgħid lin-nies jivvotaw lilu nnifsu!

Imma balleċ se jkolli nagħlaq ħalqi. Għax meta ikkontesta u ġie elett fil-Kunsill Lokali ta’ Pembroke Gino Cauchi għamel dan bħala kandidat indipendenti!

Allura bħal ma kien raġel Gino li meta kien jaħdem ma’ TVM qatt ma ċċappas mal-politika partiġġjana u dejjem żamm ruħu indipendenti (anke bħala kandidat), jien se nkun raġel ukoll u qed niskuża ruħi pubblikament talli għal ftit ħin ħsibt u kont bi ħsiebni nikteb li Gino Cauchi huwa ipokrita` mill-kbar nett.

---

It-Tieni Leġislatura - Data tal-Elezzjoni - 9 ta' Marzu, 1996 

It-Tieni elezzjoni saret nhar is-Sibt 9 ta’ Marzu 1996 fejn ħarġu jivvutaw 70% tal-popolazzjoni w ikkontestaw Seba' kandidati. Ġew eletti Paul J Baldacchino, Gerald V Bilocca, Gino Cauchi w Mark Fenech Laudi bħala Indipendenti w Ray Pace f’isem il-Partit Nazzjonalista. Il-Kunsilliera l-ġodda ħadu l-Ġurament tal-ħatra nhar il-Ħamis 28 ta’ Marzu 1996 għal perjodu ta’ tlett snin u fl-ewwel laqgħa tal-Kunsill li saret nhar it-Tnejn l-1 t’April 1996, Gino Cauchi nħatar Sindku.