Issa Nista'

Artiklu ppubblikat fil-gazzetta IN-NAZZJON tat-Tnejn 14 ta' April 2014

Ikolli nammetti li bħala salesman lill-Prim Ministru Joseph Muscat ma jirbaħlu ħadd.

Kull min jgħix f’dawn il-gżejjer żgur inzerta darba jew oħra xi reklam, avviż jew billboard mill-aħħar produzzjoni tal-Gvern tiegħu “Issa Nista’”. Din il-kampanja mhi xejn għajr propaganda partiġġjana u qarrieqa mħallsa minn flus il-poplu.

Minkejja dan, illum iddeċidejt li nagħti daqqa t’id lil Muscat u lil sħabu f’din il-kampanja. Allura se nissuġġerixxi xi reklami ġodda li jistgħu isiru fil-ġranet li ġejjin.

Il-Prim

F’xi wħud mill-filmati nissuġġerixxi li jieħu sehem il-Prim Ministru nnifsu. Nistgħu nagħmlu wieħed li fih ikun jgħid “Issa nista’ nikri l-karozza tiegħi lili nnifsi.”

Għandi ħafna iktar ideat għall-Prim imma se nieqaf hawn għax persważ li għandu ħafna aħjar minni għall-pariri.

Lill-wisq maħbuba martu Michelle ukoll nistgħu intuha parti. Naraha tagħmel wieħed li fih tgħid “Issa nista’ mmur nara lill-business partner tiegħi fi New York fejn tajniha job ta’60 elf Ewro fis-sena”
 

Eksijiet

Lill-eks Ministri u lil dawk mhux daqstant kuntenti b’Muscat mhux ta’ min iħallihom barra. Lill-Ministru Karmenu Vella nimmaġinah f’filmat fil-bajja s-sabiħa, bi tbissima kbira fuq fommu hu u jgħid “Issa nista’ nserraħ moħħi mit-tanker tal-gass u mit-tarzna fil-Freeport għax jien daqt indabbar rasi minn Birżebbuġa u nerħilha għal Brussell.”

Lill-eks Segretarju Parlamentari Għawdxi Franco Mercieca nistgħu niffilmjawh waqt li qed jopera f’xi sptar privat hu u jgħid “Issa nista’ nopera kemm irrid u kemm jogħġobni u nieħu paga tal-Gvern, il-paga tal-privat u l-onorarja tal-Parlament.”

Lit-Tabib Godfrey Farrugia nimmaġinah jieħu sehem f’wieħed li fih jgħid “Issa nista’ nagħmel tined kemm irrid.”

Ministri u Deputati

Għall-Għawdxin ma nistgħux ma nagħmlux wieħed b’Justyne Caruana. Inqabbduha tgħid “Issa nista’ nivvjaġġa bil-ħelikopter meta nsiefer fuq xogħol tal-Parlament.”

U biex ma noħolqux żbilanċ nagħmlu wieħed ukoll bil-Ministru Anton Refalo jgħid “Issa nista’ ngħid lill-vapur tal-Gozo Channel ireġġa lura biex jgħabbini.”

Fuq il-billboard ta’ Manuel Mallia m’hemmx għalfejn ikun hemm ħafna kliem. Biżżejjed ikollu miktub “Issa nista’ nagħmel li rrid.”

Tal-billboards

Nissuġġerixxi wkoll li nirriċiklaw lil  xi wħud minn dawk li ħadu sehem fil-billboards ta’ qabel l-elezzjoni.

Pereżempju lill-kantant William Mangion għandna nagħmluh fuq billboard ġdid fjamant u fuqu niktbu “Issa nista’ nsiblek garaxx biex toqgħod iddoqq fih.”

Atturi

Il-parir tiegħi hu li nsibu xi atturi jagħmluha ta’ nies komuni. Per eżempju nsibu lil xi ħadd jgħid “Issa nista’ nxaħħam impjegat tal-Enemalta biex ibagħbasli l-meter tad-dawl u jekk ninqabdu hu jmur il-ħabs u jien kemm inħallas lura dak li nkun frankajt”

Insibu wkoll attur Għawdxi jgħid “Issa nista’ nħallas iktar għall-biljett tal-vapur, naqbeż il-kju u nħallik l-art”

Nissuġġerixxi li tinstab xi koppja u niffilmjawha fil-kċina tagħha tgħid “Issa nista’ nserraħ moħħi li l-prezzijiet tal-gass, petrol u diesel se jibqgħu għoljin għal tlett xhur.”

Ċiniżi

Għal xi billboards minnhom nistgħu nsibu xi tliet atturi Ċiniżi. Wieħed minnhom nagħmluh fuq billboard jgħid “Issa nista’ nixtri passaport li jtini aċċess għall-pajjiżi kollha tal-Unjoni Ewropea.”

Ieħor nagħmluh jgħid “Issa nista’ nieħu lill-ħaddiema tal-Enemalta fl-impjanti kollha li għandna madwar id-dinja.”

Lit-tielet Ċiniż inqabbduh jistaqsi mistoqsija “Issa nista’ nixtri xi biċċa mill-isptar jew mill-Air Malta”

La qbadniha fuq iċ-Ċinizi, ta’ min nagħmlu billboard bil-Ministru Konrad Mizzi jgħid “Issa nista’ nsib job fenomenali ta’ tlettax-il elef ewro fix-xahar lill-mara tiegħi fiċ-Ċina.”

Kandidati

Dan l-islogan ta’ “Issa Nista’” tant narah effettiv li se nissuġġerixxi li din il-kampanja tintuża wkoll mill-kandidati Laburisti għall-Parlament Ewropew.

Lil Cyrus Engerer nistgħu inpoġġuh fuq billboard jgħid “Issa nista’ nistieden lill-Isqof id-dar u nagħtih xow.”

Lill-kandidat Joseph, ħu Manwel Cuschieri, nistiednuh jieħu sehem f’wieħed li fih jammetti “Issa nista’ ninsieh is-siġġu li ċedejt lil Joseph Muscat.”

Ma jistax jonqos li jkollna billboards u reklami li fihom jidher il-kandidat stilla Alfred Sant. B’wiċċu minn quddiem ikun jista’ jgħid “Issa nista’ nsir Membru Parlamentari Ewropew u jien u nsaħħan is-siġġu noqgħod ngħidilhom kemm kelli raġun ngħid li f’Malta rebaħ il-Partnership.”

Il-kollezzjoni

Il-kollezzjoni kollha tal-billboards il-ġodda tal-kampanja “Issa Nista’” se tkun għall-wiri fuq il-paġna tal-Facebook tiegħi www.facebook.com/vellanorman