Ħrejjef

Artiklu ppubblikat fil-gazzetta IN-NAZZJON tat-Tnejn 24 ta' Marzu 2014

Din il-ġimgħa ġew deċiżi żewġ libelli. Fl-ewwel każ il-Qorti ordnat lill-eks Mexxej Laburista, illum Kandidat għall-Parlament Ewropew, Alfred Sant iħallas elf Ewro lill-eks Ministru Ninu Zammit. F’każ separat l-eks Ministru Joe Grima, illum mibgħut Speċjali tal-Prim Ministru fl-Organizzazzjoni Dinjija tat-Turiżmu, instab ħati fil-konfront ta’ Richard Cachia Caruana u se jkollu jtih ħamest elef Ewro.

Il-każ bejn Alfred Sant u Ninu Zammit imur lura sitt snin u nofs. Kienet is-sena 2007 u kienet qed toqrob l-elezzjoni ġenerali. Ninu Zammit kien sar wieħed mit-targets tal-kampanja Laburista. Illum ġie pruvat li dak li kien qal Sant u li kien ġie ripetut ad nauseum fuq is-Super One ma kienx ħlief eżerċizzju ta’ tfiegħ ta’ tajn. Illum nafu li dak li ntqal dakinhar ma kienx il-verità.

Inqis din is-sentenza bħala ċertifikat ieħor li juri kemm il-kandidat stilla Alfred Sant u l-mezzi tax-xandir tal-Partit Laburista mhumiex kredibbli u ma jistgħux jitwemmnu. L-ikbar ħrafa li qatt qalulna tmur lura ħdax-il sena. Kien id-9 ta’ Marzu 2003. Dakinhar Sant u sħabu pruvaw ibellugħuhielna li l-maġġoranza tal-poplu Malti ivvotat kontra s-sħubija ta’ Malta fl-Unjoni Ewropea. Qatt ma fhimt kif dakinhar kien hemm min emmen u rrepeta din il-gidba.

KAMPANJA

La jgħaddu l-festi tal-Ġimgħa Mqaddsa huwa mistenni li l-partiti jibdew il-kampanja għall-elezzjoni tal-Parlament Ewropew. M’għandix dubju li l-Partit Laburista se jkun qed jirrakkonta bosta ħrejjef oħra bħal dawk li ntqalu fuq Ninu Zammit u Cachia Caruana. U m’għandix dubju li fl-istess nifs li jkunu qed jitfgħu t-tajn bl-addoċċ ikunu qed jgħajjru lilna “negattivi”!

KONTIJIET

Bħal lum ġimgħa kont mistieden fi programm flimkien mal-Kandidat Laburista Charlon Gouder. Bdejna niddiskutu l-proġett tal-power station il-ġdida u t-tanker tal-gass fil-port ta’ Marsaxlokk. Fl-argumenti tiegħu l-kandidat Laburista prova jorbot dan il-proġett mar-roħs li tħabbar fil-kontijiet tad-dawl u l-ilma. Ħrafa oħra. Il-verità hi li ż-żewġ affarijiet m’għandhom x’jaqsmu xejn ma xulxin.

Ir-roħs fil-kontijiet jista’ jsir biss permezz tal-proġett tal-interconnector bejn Malta u Sqallija u permezz taż-żieda fl-effiċjenza fil-produzzjoni tal-elettriku li ġabet il-power station tal-BWSC, żewġ proġetti ta’ Gvern Nazzjonalista bl-għajnuna ta’ fondi Ewropej.

Hija ħaġa ovvja li d-dawl u l-ilma mhux se jorħos minħabba proġett li għadu lanqas biss beda. Għal darb’oħra ma nifhimx kif ħrafa bħal din tista’ titwemmen.

KAROZZI

Mhix ħrafa ż-żieda qawwija li qed jesperjenzaw dawk li jmorru jħallsu l-liċenzja tal-karozza. F’ħafna djar li nidħol fihom qed nara ireċevuti li juri għoli li kultant jaqbeż il-mitt Ewro u iktar. Jekk niftakar sewwa, fid-diskors tal-Budget il-Ministru Scicluna kien semma’ li dawn se jogħlew biss b’xi għaxar Ewro.

PASSAPORTI

Il-kitba kienet fuq il-ħajt. Kienet ħaġa ovvja li ladarba l-Kummissjoni Ewropea tapprova l-iskema ta’ bejgħ taċ-ċittadinanza Ewropea li ħareġ biha l-Gvern ta’ Muscat, il-pajjiżi Ewropew l-aktar fi kriżi se jitħajru jagħmlu l-istess. Bdiet il-Bulgarija, kompla l-Portugall u minjaf kemm għad irridu nisimgħu b’aktar.

Il-Prim Ministru tagħna kien mingħalih li se jkun hu biss li jbiegħ iċ-ċwievet għall-Unjoni Ewropea, iżda mar żmerċ. Pajjiżi oħrajn se jkunu qed jikkompetu mal-iskema Maltija bi programmi u prezzijiet orħos u iktar vantaġġużi. X’aktarx il-biljun li wiegħed Muscat dalwaqt jingħaqad mal-lista tal-ħrejjef.

MILAN

Xi ħadd iħobb lit-tim tal-Milan qalli li minn dakinhar li fl-istadium ta’ San Siro tfaċċa l-Prim Ministru ta’ Malta, ir-rossoneri ma ħadux ir-ruħ u tilfu kważi l-partiti kollha li lagħbu! Gawdew l-Atletico Madrid, il-Juventus, l-Udinese u tim li nissimpatizza miegħu jien, Parma. Dawn kollha ħadu punti massimi minn fuq dahar il-Milanisti fl-aħħar xahar.

Ma’ dan il-ħabib tiegħi spiċċajt niddefendi lill-Prim Ministru Muscat. Għidtlu ċar u tond li jien ma nemminx bl-għajn. Ngħid għalija, dawn kollha ħrejjef.