Jien minix Daphne...

...u din hija l-istorja tiegħi, ġurnalist fuq l-istazzjon tal-iStat Malti, fil-qosor.

Qabel l-aħħar elezzjoni ġenerali l-Prim Ministru Joseph Muscat (dakinhar Kap tal-Oppozizzjoni) għedded lili u lil ġurnalist ieħor li għal kull daqqa li jħoss li se nagħtu lill-partit tiegħu se jkun qed jagħtina lura tnejn b'saħħtu kollha, taħt iċ-ċintorin, fejn iweġġa.

Sa mill-għada tar-rebħa elettorali, il-Gvern Laburista beda jaħdem biex ikeċċini mix-xogħol tiegħi fuq l-istazzjon nazzjonali.

Dan minkejja li r-rekord tiegħi kien impekkabbli (qatt, ebda partit, inkluż il-Partit Laburista, ma lmenta dwari) u minkejja li l-programm ta' ġrajjiet kurrenti ta' kuljum li kont bdejt nipproduċi u nippreżenta ftit xhur qabel fuq l-istazzjon nazzjonali kien qed jagħmel is-suċċess mixtieq.

Dan minkejja li ħadd (kif irriżulta anke minn xhieda fil-Qorti) fit-tmexxija tal-istazzjon nazzjonali, inkluż dawk appuntati mill-Gvern Laburista, ma talbu jew ma xtaqu li jiena nitneħħa.

L-unika ħtija tiegħi kienet, kif qalli xi ħadd qrib tal-Prim Ministru, li miegħi 'ma tirranġax'. Darba din il-persuna sabitni u qaltli li jekk irrid inżomm xogħoli fil-PBS, naf x'għandi nagħmel biex nieħu ħsiebu. Ir-risposta tiegħi kienet li ġurnalist li jieħu ħsieb lill-poter biex 'jieħu ħsieb xogħolu' ikun tilef xogħolu minnufih u miegħu d-dinjita`.

U r-risposta ta' Joseph Muscat kienet id-daqqiet taħt iċ-ċintorin u t-tkeċċija.

Tliet xhur wara jiena ftaħt kawża kontra l-Prim Ministru dwar din l-istess tkeċċija. Jgħaddu ftit jiem u l-Kap tal-Komunikazzjoni tal-istess Joseph Muscat u kollega tiegħu ordnaw lill-Pulizija biex jarrestawni u jissekwestrawli ħwejġi (mobile phone u tablet) fl-ajruport internazzjonali ta' Malta (fejn kont bdejt naħdem) bl-iskuża li kont ħadtilhom ritratt f'post pubbliku, liema ritratt lanqas biss jeżisti.

Ovvjament, il-Pulizija obdew. U mistagħġbin kemm dakinhar Joseph Muscat kien ferħan u paxxut u kemm ċempel nies jiftaħar b'li kien ġara.

Ftit tal-jiem wara l-Qorti ddikjarat li ma kien hemm ebda 'suspett raġunat' li jien dakinhar stajt ikkommettejt xi reat, ħelsitni minn kull akkuża u ordnat li l-mobile u t-tablet jingħatawli lura.

L-arrest kien biss vendikazzjoni oħra maħsuba u magħġuna minn nies f'Kastilja li l-uniku intenzjoni tagħhom kienet li jbeżżgħu u jintimidaw lil kull min jażżarda jgħolli rasu u jieqfilhom.

Dan huwa l-mod kif il-Gvern Laburista jimxi ma' ġurnalist li jrid ikun biss ġurnalist, li mhux lest jinxtara u li mhux lest jilgħaqlu l-warrani.

Bija, fil-bidu tat-treġija tiegħu, Joseph Muscat ried jibgħat messaġġ ċar lill-ġurnalisti kollha. Il-ġurnata minn filgħodu turik.

European Federation of Journalists, International Federation of Journalists, International Press Institute, Index on Censorship and Committee to Protect Journalists please note.

Nota tal-aħħar. Wara dawn l-esperjenzi koroh jiena sseħibt politikament u ġurnalistikament mal-uniku partit politiku f'Malta li jista' jneħħi lil Joseph Muscat u lil sħabu (ħafna minnhom maqbuda fi skandli oxxeni ta' korruzzjoni) mis-siġġijiet tal-poter.