Norman Vella resigns from PN after Hermann Schiavone gets re-admitted

From Newsbook

Norman Vella has resigned from the Partit Nazzjonalista (PN) after the party’s Board of Ethics concluded on Tuesday that PN MP Hermann Schiavone had not breached any instruction or party rule when he met with 17 Black’s Yorgen Fenech.

In a Facebook post, Norman Vella said that he had joined the PN at the party’s darkest moment in 2013. He added that he gave four years to the party and had contested the European Parliament elections in a bid to stand up to Joseph Muscat.He added that he did this is a personal sacrifice as he believed in certain principles. Vella continued that it is because of this that people from the fifth electoral district gave him their vote, and allowed Hermann Schiavone to become an MP thanks to the 1,667 votes that the latter inherited from him (Vella).

He admitted that if he did not express his anger at the party’s Ethical Board’s decision on Schiavone, he would be letting himself and those who trust him down. The PN Ethical Board’s decision came after Hermann Schiavone suspended himself from the party on the 10th April 2019.

Vella decided to stand by his guns and resign from being a PN candidate, local councillor and member. He thanked all those that helped him and concluded that, notwithstanding the disappointment, this experience had still taught him a lot.

PN Board of Ethics finds that Schiavone did not violate regulations

Norman Vella resigns from PN after Schiavone’s re-instatement

The former PN candidate and TV presenter believes the party’s decision to re-instate Hermann Schiavone flies in the face of all that the PN fought for in the 2017 election

From maltatoday
By Kurt Sansone

Norman Vella has resigned from the Nationalist Party after district rival, Hermann Schiavone, was yesterday re-instated in the parliamentary group.

Vella who contested as a PN candidate in the 2014 European Parliament election and the 2017 general election insisted the Schiavone decision went against what the party stood for.

“Today, I would be letting myself and all those who voted for me down if I do not express my anger at the party’s decision, which I believe goes against what we worked and voted for two years ago,” Vella said.

He made the announcement in a lengthy Facebook post on Tuesday night, shortly after the PN executive voted to re-instate Schiavone in the parliamentary group.

Vella also acknowledged the leadership’s right to take the decisions it deems fit and move the party in the direction it wants and in the circumstances had no option but to resign from the PN.

In the last election, Schiavone was elected on the Fifth District on the strength of the votes he inherited from Vella when the former TV presenter dropped from the race.

The district saw the PN gain a seat and if Schiavone resigned from parliament, Vella would have been in pole position to get elected in a casual election.

Schiavone’s mistake was meeting Yorgen Fenech earlier this year to ask for a sponsorship of a hall.

Vella, like many others within the PN, felt the party’s decision to approach Fenech was inconsistent with its harsh criticism of government exponents Konrad Mizzi and Keith Schembri over their connection with Dubai company 17 Black, a company owned by Fenech.

Accompanying Vella’s Facebook post were several congratulatory notes from others who insisted they were also “political orphans” in view of the PN’s direction under Adrian Delia.

However, others were less kind, accusing Vella of jumping ship and noting that the “fight against Joseph Muscat” could not be won with antics like his.

The PN has emerged from a bruising period after losing dramatically in the local and European elections last May. In July, Adrian Delia won a vote a confidence among PN councillors, giving him a renewed mandate to lead the party until the general election.

However, almost a third of councillors voted against him, a sign of the deep divisions within the party.

Schiavone jerġa' jidħol ... Norman Vella jitlaq 'il barra

Norman Vella jirriżenja mill-PN wara li l-partit reġa aċċetta lil Hermann Schiavone lura fil-Grupp Parlamentari

Minn Albert Gauci Cunningham ippubblikat fuq ILLUM

Norman Vella ilejla ħabbar li rrizenja minn Kunsillier, kandidat u anke membru tal-Partit Nazzjonalista wara d-deċizjoni tal-partit li d-Deputat Hermann Schiavone m'għamel xejn ħażin meta ltaqa' ma' Yorgen Fenech, id-Direttur tal-Kumpanija 17 Black.

Fil-fatt kien iktar kmieni illum li kien deċiż illi Schiavone se jerġa jidħol fil-Grupp Parlamentari tal-PN wara illi kien rriżenja fuq storja ta' laqgħa bejnu u Fenech, flimkien ma' Kristy Debono, fuq il-gazzetta The Sunday Times.

Vella sostna li  "illum inkun qed nonqos lili nnifsi u lil dawk kollha li tawni l-fiduċja jekk ma nesprimix għadab għal deċiżjoni tal-partit li nħoss li tmur kontra dak li ħdimna u vvotajna għalih sentejn ilu. Fl-istess waqt nirrikonoxxi li min ġie fdat bit-tmexxija tal-partit u tal-organi tiegħu għandu l-jedd jieħu d-deċiżjonijiet li jidhirlu li huma l-aħjar u jmexxi l-partit fid-direzzjoni li jħoss li għandu jmexxih."

Kien hawn li qal illi huwa se jagħżel it-triq tal-irġulija u jirriżenja.

Malta m’għadhiex f’qalbu

Ippubblikat minn Newsbook

Ilna minn ftit wara l-Għid il-Kbir nisimgħu kemm l-esponenti tal-Partit Laburista għandhom lil Malta f’qalbhom. L-2019 se tibqa’ mfakkra bħala s-sena li fiha iktar rajna qlub fuq Facebook, fuq it-televixin u fit-toroq Maltin matul ix-xahar ta’ Mejju, milli rajna fi Frar. Kważi kważi Joseph Muscat jista’ jibda jiftaħar li rnexxielu jirbaħ anke lil San Valentinu!

Fost dawn l-esponenti Laburisti – m’iniex se nuża l-kelma ‘Soċjalisti’ għax dan il-Gvern uriena li huwa kollox barra Soċjalist – hemm wieħed li l-vuċi tiegħu ilha tpaxxi lil widnejna fuq ir-radju mill-ewwel jiem tal-liberalizzazzjoni fis-snin disgħin. Qed ngħid għal Emanuel Cuschieri, li kemm ilu jeżisti l-internet żied il-kitba fuq il-Facebook mal-kurrikulu komunikattiv tiegħu.

L-esperjenzi ta’ Cuschieri fl-arena politika kienu bosta u minnhom m’għandix dubju li tgħallem ħafna. Tant tgħallem li meta nhar il-Ħadd il-partitarji Laburisti – bir-raġun – kienu qed jiċċelebraw rebħa oħra kbira huwa kien diġà qed jaħseb fil-kampanja elettorali li jmiss.

Minflok fetaħ flixkun xampanja Cuschieri fetaħ il-laptop, daħal fil-Facebook u kiteb messaġġ lil grupp nies li tant iħobbu lil Malta li jsejħu lilhom infushom ‘Laburisti sal-Mewt’. Lil dawn appellalhom biex waqt li qed jifirħu, jindirizzaw il-kritika tagħhom biss lill-Partit Nazzjonalista u mhux lill-Kap tal-partit Adrian Delia. Qalilhom “Sentejn oħra malajr jaslu u l-Partit Laburista jaqbillu li (Adrian Delia) ikun għadu fit-tmun tal-PN. Użaw moħħkom!”

Ibda biex irrid inrodd ħajr lil Cuschieri talli żvelalna li l-elezzjoni ġenerali li jmiss se terġa’ ssir sena qabel iż-żmien: sentejn oħra mhux tlieta, qal. Imma l-punt prinċipali ta’ dan l-artiklu huwa dan li ġej.

Indipendentement jekk wieħed jaqbilx ma’ Cuschieri jew le dwar il-Kap tal-PN, żgur kulħadd jaqbel li min tassew iħobb lil Malta ma jridx li l-Oppożizzjoni tkun iktar dgħajfa milli hi llum. Anzi, min vera għandu lil Malta f’qalbu jrid li Malta jkollha Oppożizzjoni b’saħħitha, jekk jista’ jkun daqs il-Gvern. Imma l-iskop ta’ Cuschieri mhuwiex li Malta jkollha demokrazija b’saħħitha. Bil-kitba tiegħu wera li l-uniku interess tiegħu huwa li meta tasal elezzjoni ġenerali oħra l-Partit Laburista jibqa’ fil-Gvern.Naturalment jien m’għandi ebda dritt nindaħal lil Cuschieri u sħabu lil min għandhom iħobbu l-iktar bejn Malta u l-Partit Laburista. Dik hija għażla li jridu jagħmlu huma. Huwa ċar għalija li dik l-għażla ilhom li għamluha u dan mhux qed ngħidu biss għax rajt din il-kitba ta’ Cuschieri imma għax osservajt kif ġab ruħu l-Partit Laburista fl-aħħar snin meta ma ddejjaq xejn idgħajjef isem Malta biex jipproteġi lil dawk li jmexxuh.

Dawk li waqt il-kampanja elettorali immaġinaw li jekk jittieħed ECG tal-Partit Laburista jibda jinstema’ l-Innu Malti fl-isfond kienu, ovvjament, qed joħolmu. Huwa f’dan l-isfond li wieħed għandu jqis il-kritika u l-pariri li dawn l-esponenti qegħdin u se jkunu qed jagħmlu fil-jiem u l-ġimgħat li ġejjin. Huwa evidenti li dawn mhumiex u mhux se jkunu ġenwini iżda huma biss parti minn strateġija biex iżommu l-poter taħt idejhom, jekk jista’ jkun “sal-mewt” kif semmew il-grupp ta’ Facebook.

Żewġ ħwienet tal-ħjata fil-pjazza

Ippubblikat minn Newsbook

Fil-pjazza tar-raħal kien hemm żewġt iħwienet ibigħu l-magni u l-aċċessorji tal-ħjata. Kienu eżatt faċċata ta’ xulxin: wieħed fuq il-lemin tal-knisja u l-ieħor fuq ix-xellug. Kien ilhom snin twal hemm. Tal-lemin dejjem nafu iktar imfittex min-nies tar-raħal. Ġieli kien ikollu kju sa fuq il-bankina. Tax-xellug ukoll kellu bejgħ tajjeb imma qatt ma rnexxielu jkun popolari daqs ta’ quddiemu.

Imbagħad ġie żmien fejn il-bejgħ beda jbatti għat-tnejn li huma. L-ikbar daqqa għall-ewwel ħadha l-ħanut tax-xellug li l-ftit bejgħ li kellu spiċċalu kważi fix-xejn. Is-sid ma kellux għażla ħlief li jżarma n-negozju li kien ilu f’idejn il-familja minn żmien bużnannuh.

Is-sid tal-ħanut tal-lemin kien dara fil-ġid. Kull meta kien jara l-ħanut vojt kienet titlagħlu fawra għal rasu. Meta l-ħanut ta’ faċċata għalaq reġa’ ħa ftit tar-ruħ imma ma damx wisq igawdi mill-monopolju li kien kiseb fir-raħal. In-nies ma baqgħetx tixtri magni tal-ħjata, suf, labar u l-bqija bil-kwantità ta’ dari. Għalxejn imbagħad biddel il-vetrina u għalxejn biddel kemm-il impjegat: il-bejgħ xorta baqa’ jonqoslu. Intant ta’ faċċata fetaħ ħanut tal-ħwejjeġ u bil-mod il-mod beda jżid fil-popolarità u fil-bejgħ.

Is-sid tal-ħanut tal-lemin iktar beda jħossu frustrat. Ma’ kull min kien jiltaqa’ kien jitkaża li n-nies tar-raħal ma kienx għadhom bieżla bħal dari għax saru jippreferu jixtru l-ħwejjeġ lesti milli jħituhom. Kien igerger ħafna anke kontra l-fatt li aktar nisa fir-raħal bdew isibu impjieg u li ma kienx għad għandhom ħin iħitu. In-nies kienu jisimgħuh, jitbissmulu u jkomplu b’ħajjithom.

Biex iktar tgħaxxaqhielu ż-żgħażagħ tar-raħal lanqas baqgħu jitgħallmu l-ħjata. Din kienet iddejqu wisq. Wara li qata’ qalbu li dawn jitgħallmu mingħand ommijiethom kien saħansitra mar ikellem lill-Ministru tal-Edukazzjoni biex idaħħal il-ħjata fil-kurrikulu. Meta ra li l-Ministru ma tax kasu ma baqax jivvota.

Eventwalment il-ħanut beda jiftħu għalxejn. Kulma kienu jmorru għandu kienu ftit anzjani ħbieb tiegħu, iktar biex jgħidu kelma u jgħaddu siegħa milli biex jixtru xi ħaġa. Meta xeba’, għalaq u beda jintefa’ l-każin tal-banda li jinsab bieb ma’ bieb. Tmur xħin tmur issibu hemm; igerger kontra l-moderniżmu u kontra kif saru n-nies tar-raħal hu u jlegleg tazza te bil-ħalib tal-bott wara l-oħra.

Intant il-ħanut tax-xellug ma baqax ibigħ il-ħwejjeġ. Illum minfloku hemm uffiċċju mmexxi mit-tfal tas-sid. F’dan l-uffiċċju hemm jaħdmu xi nofs tużżana żgħażagħ quddiem kompjuter. Ma nafx eżatt x’jagħmlu ġo fih imma naf żgur li għandhom negozju tajjeb ħafna. Mhux l-ewwel darba li tard filgħaxija, jien u għaddej mill-pjazza, ilmaħthom mit-tieqa għadhom għaddejjin b’xogħolhom.

Tant għandhom negozju tajjeb li dan l-aħħar it-tfal tas-sid ta’ dak li kien il-ħanut tal-lemin daħlu jaħdmu magħhom. Kienu qatgħu qalbhom jipprovaw jikkonvinċu lil missierhom jagħtihom il-ħanut tal-ħjata biex jiftħu għal rashom huma wkoll. Kull meta kienu jżerżqulu xi kelma ħlief fuq kemm kien glorjuż il-passat u kemm kienu aħjar ilbieraħ u lbiraħtlula ma kinux jisimgħu mingħandu.

Fil-pjazza llum għad hemm il-knisja fin-nofs, uffiċċju ġdid mimli nies u ħajja fuq ix-xellug u ħanut dejjem magħluq u mimli għanqbut fuq il-lemin.

Il-karattari u l-postijiet imsemmija f’din l-istorja huma kollha fittizji.

Il-Ħabiba tal-Prim Ministru u ħbieb oħra

Dan il-blogg kien ippubblikat minn Newsbook

Nhar is-Sibt il-Prim Ministru għoġbu jagħtina l-aħbar li flimkien ma’ martu qed irabbi ġerwa taċ-Chow Chow. Fuq Instagram faqqalna ġmiel ta’ ritratt tal-familja u nfurmana li l-kelba għandha erba’ xhur u li semmewha Ħabiba. Mill-ammont ta’ shares u ta’ qlub fil-kummenti li kien hemm taħt ir-ritratt, qed nassumi li l-Ħabiba tal-Prim Ministru f’tebqa t’għajn saret l-iktar Chow Chow popolari fl-arċipelagu Malti.

Biex jibqa’ fuq is-suġġett tal-ħbieb, l-għada l-Ħadd il-Prim Ministru qalilna wkoll li flimkien mal-ikbar ħabib tiegħu Keith Schembri u n-nisa tagħhom, xi sentejn u nofs ilu kienu mistiedna għat-tieġ ta’ Ali Sadr Hasheminejad, cioè iċ-Chairman u s-sid tal-Bank Pilatus li bħalissa jinsab maqful f’ċella Amerikana, akkużat fost oħrajn b’ħasil ta’ flus u frodi bankarja.

Dan it-tieġ kien sar fl-Italja, preċiżamet fil-belt rinomata għall-imħabba, Venezja. Minkejja l-ħafna xogħol li huma mgħobbijin bih il-Prim Ministru u idu l-leminija li tiddiletta bil-kumpaniji fil-Panama, irnexxielhom jitilqu kollox minn idejhom u jħallu pajjiżna biex ikunu preżenti għal dan it-tieġ.

Min bħali għandu ftit memorja, żgur jiftakar lil Muscat Kap tal-Oppożizzjoni jgħid li jippreferi jmur jiekol burger biċ-chips milli jmur għal xi ċena formali bħal ma kienet dik statali li temmet u ċċelebrat il-Presidenza ta’ Eddie Fenech Adami.

Għal dik l-ikla, Muscat ma kellu bżonn jaqbad ebda ajruplan kif kellu jagħmel għat-tieġ ta’ Pilatus.

Imma ngħiduha kif inhi, Fenech Adami qatt ma kien ħabib kbir ta’ Muscat!

M’inix f’pożizzjoni ngħidilkom jekk fit-tieġ li marru għalih fil-belt tal-kanali u l-gondoli servewx biss burgers u chips u allura Muscat ma seta’ qatt jitilfu, għax ovvjament ma nafx. Minn dan it-tieġ ma rajna ebda ritratt fuq Instagram, Twitter jew Facebook tal-Prim Ministru. Forsi għax Hasheminejad mhux gustuż u fotoġeniku daqs il-Ħabiba taċ-Chow Chow? Min jaf!

Nafu żgur li kemm ilna nisimgħu dwar il-Pilatus u l-allegazzjoni (miċħuda) li d-dokumenti li juru li Egrant hija ta’ Michelle Muscat kienu f’dan il-Bank, Muscat qatt ma ħass il-bżonn jgħidilna li mar għal dan it-tieġ Venezjan u jispjegalna x’livell ta’ ħbiberija hemm jew kien hemm bejnu, martu u ċ-Chief of Staff tiegħu ma’ dar-raġel mill-Iran.

Il-Prim Ministru tagħna jemmen li l-poplu Malti fuq il-Ħabiba ta’ erba’ saqajn u ruxxmata suf li marret tgħix miegħu f’Burmarrad għandu dritt ikun jaf u mhux fuq ħbieb oħra ta’ żewġ saqajn u ruxxmata bwiet.

L-għajn tal-ħasselin (tal-flus)

Dan il-blogg kien ippubblikat minn Newsbook

Jgħidu x’jgħidu Joseph Muscat u l-akkolti tiegħu, ir-ritratti u l-filmati tal-partitarji Laburisti jiċċelebraw ir-rebħa elettorali ta’ Ġunju li għadda quddiem il-Bank Pilatus ma jista’ jħassarhom ħadd.

Dawk il-partitarji ma marrux hemmhekk b’kumbinazzjoni. Marru għax qiesu lill-Bank Pilatus bħala parti mir-rebħa kbira li kienu qed jiċċelebraw.

Ġustament, dawn il-Laburisti identifikaw lill-Pilatus bħala entità li hija ħaġa waħda mat-tmexxija tal-partit u tal-Gvern li huma jappoġġaw.

Marru hemm anke għax kienu semgħu kemm-il kelliem tal-Oppożizzjoni jgħidilhom x’kien tassew dan il-Bank u kif kien qed jintuża min-nies fil-poter. Bit-tixjir tal-bnadar Laburisti quddiem il-Pilatus, dawn il-partitarji kienu qed jibgħatu l-messaġġ li bis-saħħa tar-rebħa ta’ Muscat, il-Bank Pilatus seta’ jibqa’ għaddej jagħmel dak li kien qed jagħmel mingħajr ebda xkiel.

Iżda ġara li ftit tax-xhur wara, propju bħalissa int u taqra dan il-blogg, is-sid tal-Bank Pilatus jinsab arrestat fl-Istati Uniti fejn qed jiffaċċja iktar minn seklu ħabs, bl-akkużi ewlenin ikunu ħasil tal-flus u frodi bankarja. Se tismagħhom jgħidu li l-akkużi fil-konfront tiegħu m’għandhomx x’jaqsmu mal-istejjer li smajna bihom f’pajjiżna. Veru. Iżda issa huwa ċar għal kulħadd x’tip ta’ negozju jispeċjalizza fih dan ir-raġel mill-Iran li jġorr fuqu ruxmata passaporti.

Il-mistoqsija li ħafna nies wieġbu fis-skiet ta’ darhom kemm ilha li ħarġet din l-aħbar hija: Persuna li kienet lesta tisfida l-liġijiet u s-sanzjonijiet tal-ikbar super-potenza fid-dinja u għal dan tissogra piena ta’ iktar minn seklu maqfula f’ċella, se tiddejjaq jew se jkollha xi skruplu tkun kompliċi ma’ politiċi mill-iżgħar pajjiż fl-Unjoni Ewropea fil-ħasil tal-għemejjel ħżiena tagħhom?

Ir-risposta ovvja għal din il-mistoqsija tidħol b’mod perfett fil-jigsaw puzzle ta’ evidenza li ilna nisimgħu biha minn meta l-ġurnalista assassinata Daphne Caruana Galizia bdiet tiżvela l-istejjer tal-kumpaniji sigrieti fil-Panama li s-sidien tagħhom huma l-eqreb nies tal-Prim Ministru Muscat.

U hawn niġu għal filmat ieħor tal-Pilatus li ħadd ma jista’ jħassar mill-memorja kollettiva: il-filmat tas-sid tal-Bank (l-istess wieħed arrestat fl-Istati Uniti) jaħrab b’bagalja f’nofs ta’ lejl ftit tal-ħin wara li l-istess Daphne Caruana Galizia allegat li t-tielet kumpanija fil-Panama miftuħa ma’ ta’ Keith Schembri u Konrad Mizzi - Egrant - hija tal-mara tal-Prim Ministru.

Apparti x-xena pjetuża tal-Kummissarju tal-Pulizija jiekol il-fenek, dakinhar kien hemm xena oħra li wieħed m’għandux jinsa. Muscat kien kellem lill-ġurnalisti f’Kastilja u għamilhielhom ċara li ma kienx se jordna inkjesta dwar l-allegazzjonijiet ta’ Caruana Galizia. Kellhom jgħaddu s-sigħat - sigħat li matulhom is-sid tal-Bank Pilatus ħarab bil-bagalja u ajruplan privat tar bla passiġġieri lejn l-Ażerbajġan - biex Muscat reġa’ bdielu u ordna li ssir inkjesta.

X’kien hemm f’dik il-bagalja jaf ma nsiru nafu qatt, iżda diġà nafu ħafna fuq min kien qed iġorrha: raġel li dwaru llum hemm evidenza ċara li serva ta’ għajn għall-ħasselin tal-flus.

Taħt assedju

Iltaqgħu xemgħa u fjura,

Ġewwa misraħ f’nofs il-Belt,

Tħallew minn tfajla mbikkma,

Għajn ta’ tama f’dan il-għelt.

Hemm, imħares minn tliet ġganti,

Weqfin, siekta, viġilanti,

Tpoġġa nkwatru b’wiċċ ta’ mara,

B’daqqa t’għajn tfakkarna x’ġara.

Qalb l-istorbju tal-‘kultura’,

Tinstema’ talba ta’ kultant,

Waqaf xwejjaħ, ħalla kitba,

Martu żejnet b’werqtejn rand. 

Mal-lejl ġew idejn moħbija,

Fl-ikreh dlam, bħal fil-Bidnija,

Ħarbtu, kissru, frak u biċċiet,

U l-ġganta tal-mafkar bkiet.

Iżda malli sebħet l-għodwa,

Xemgħat u fjuri ġew oħrajn,

Id-dnub b’rabja tqalleb f’soddtu,

Mhux se nħalluh jagħlaq għajn m’għajn.

​Il-pensjoni Parlamentari: il-kwistjoni għadha mhix magħluqa

Dan il-blogg kien ippubblikat minn Newsbook

Matul din il-ġimgħa inxtegħel dawl fuq il-privileġġ li jgawdu l-Parlamentari tagħna meta jiġu biex jirtiraw mix-xogħol.

Id-diskussjoni qamet għax il-Gvern ried jestendi l-privileġġi eżistenti għal dawk li jkunu eletti fil-Kamra darba biss u għal persuni oħra bħall-Membri tal-Parlament Ewropew, is-Segretarji Permanenti, l-Ispeaker u oħrajn.

L-Oppożizzjoni għall-ewwel qablet, imbagħad irtirat l-appoġġ tagħha. Din il-mossa wasslet biex il-Gvern jirtira l-proposta minnufih.

Jidher li dan l-iżvilupp intlaqa’ tajjeb ħafna mill-poplu u l-politiċi ġustament ftaħru li għamlu dan il-pass għax ‘semgħu lin-nies’. Iżda l-argumenti li kkonvinċew lill-Oppożizzjoni u konsegwentement lill-Gvern jirtiraw mill-pożizzjoni li ħadu oriġinarjament, ma kinux relatati mal-proposta li dawn il-privileġġi jkunu estiżi.

Jekk iddur dawra ma’ dak li nkiteb u ntqal minn opinjonisti u mill-poplu fuq il-mezzi soċjali, issib li l-oġġezzjoni ewlenija hija dwar l-eżistenza tal-privileġġ innifsu.

In-nies għandhom raġun. M’hemm ebda loġika li biha tista’ tispjega għaliex meta niġu għall-pensjoni, il-Parlamentari jkunu privileġġati fuq il-bqija tal-poplu. Din kienet l-għajta tan-nies f’dawn il-ġranet u din l-għajta għadha ma nstemgħetx. Għalhekk, il-kwistjoni għadha miftuħa beraħ.

Jekk il-Parlamentari jħossu li huma mħallsin ftit għall-kontribut li qed jagħtu lill-pajjiż, is-soluzzjoni m’għandhomx jeħduha meta jirtiraw billi jkollhom drittijiet tal-pensjoni ferm aħjar minn tal-bqija. Is-soluzzjoni għandha tingħatalhom waqt li għaddejjin bil-ħidma tagħhom, billi l-ħlas li jirċievu jkun jixraq tassew għall-ħidma li qed jagħmlu.

Id-drittijiet tal-pensjoni għandhom ikunu l-istess għal kulħadd. Din hija l-għajta tal-poplu li l-Parlamentari tagħna semgħu u li fuqha għandhom jaġixxu.

Ir-risposti li nesa jagħti Chris Fearne

Dan il-blogg kien ippubblikat minn Newsbook

Għaxxaqha Chris Fearne! Mar għal interview, ma studjax biżżejjed u se jkollu jgħaddi l-vaganzi tal-Milied jisma’ n-nies jgħadduh passata huma u jomogħdu l-canapès u l-pastizzi.

Kull min rah quddiem Tim Sebastian (Conflict Zone, Deutsche Welle) baqa’ mbellaħ kif il-Prim Ministru in waiting, nesa jagħti lil dal-biċċa ġurnalist Nazzjonalist l-iktar risposti ovvji li xbajna nisimgħu hawn Malta.

Kienu jafu li lil dan Sebastian għalxejn jhedduh li jekk ma joqgħodx attent x’jistaqsi se jkeċċuh mix-xandir kif għamlu miegħi u m’oħrajn.

Lanqas ma setgħu joffrulu xi job jew konsulenza biex jieħu ħsieb lill-viċi ta’ Joseph, għax jafu li kien jibgħathom isaqqu l-ħass ta’ fejn se jibnu t-torrijiet.

Allura kull ma kellhom jagħmlu kien li jħejju lista ta’ risposti biex Fearne jitgħallimha bl-amment u bħal pappagall leali lejn sidu jirrepetiha lill-Ingliż tad-Deutsche Welle.

Ħasra li Kurt Farrugia bħalissa mħabbat ħafna jikkonvinċi lid-dinja li f’Malta għandna kollox aqwa mill-bqija tal-Ewropa, għax kieku lil Fearne żgur kien iħejjilu lista li kienet tħalli lil xi puppatur bħali jew bħal Tim Sebastian bla kliem.

Kieku Fearne żgur ma kienx jinsa jsemmi t-€92. Żgur kien jgħid li dan l-għaġeb kollu li qed jagħmlu n-Nazzjonalisti huwa biss minħabba dawn l-imberkin €92 li Konrad Mizzi dar id-dinja jfittex bank għalihom.

U kif seta’ jinsa lil Putin f’intervista internazzjonali bħal din? Kif seta’ jinsa jgħid li din l-istorja ta’ Egrant u l-whistleblower mir-Russja aktarx ġejja minn Putin kif qal Muscat lejlet l-elezzjoni?

Bilħaqq, l-elezzjoni. Anke dik nesa jsemmi Fearne. Ma qallux lil Sebastian li f’Ġunju l-poplu ddeċieda li jrid lil Schembri u lil Mizzi f’Kastilja ħdejh u ħdejn Muscat. Ma qallux li t-tort mhux tiegħu, mhux tagħhom, imma tal-poplu u li dal-mistoqsijiet kollha jmorru kontra r-rieda tal-poplu sovran.

Possibbli ma jafx dan Sebastian li f’Ġunju kien hemm min saħansitra mar jiċċelebra quddiem il-Bank Pilatus? Nota: Lil dan imnalla ma semmiehx għax kien jheddu b’xi kawża li tħallieh għarwien ħuta.

Ħafna stagħġbu wkoll kif Fearne ma qal xejn fuq it-tradituri ta’ Malta. Ma jafx Fearne li din tat-‘tradituri’ dejjem tagħti l-frott? Nesa kemm ħareġ ġid meta lil Mintoff għajruh traditur? Ma ndunax kemm sejrin tajjeb fil-voti fil-Parlament Ewropew kemm ilhom li bdew isejħu lil Casa u l-bqija ‘tradituri’?

Insomma, issa li hemm hemm. Huwa stat ta’ fatt li jekk Fearne jkollu intervista oħra, jeħtieġ jipprepara ferm aħjar minn hekk. Jekk irid imur tajjeb u jimpressjona żgur irid juża iktar kliem bħal dak li jħobb juża l-mexxej tiegħu, bħal pereżempju ‘chicken’.

Jeħtieġ ikun iktar pożittiv ukoll u fir-risposti jżomm dejjem fiss f’moħħu li l-partit li qed jirrappreżenta qisu r-Real Madrid tal-politika, jiġifieri l-partit champion tad-dinja!

Jekk Fearne jrid li darboħra tant imur tajjeb, li s-sena d-dieħla jagħtuh Ġieħ ir-Repubblika, meta l-ġurnalist jibda jtawwal ilsienu u jistaqsi xi ftit iżżejjed bħal m’għamel Sebastian u kif, ta’ melħa li jien, kont spiss nagħmel fuq TVM, għandu jħares dritt f’għajnejh u jgħidlu ‘Niġi għalik u nifqgħek!’.

Arrestawni minħabba Daphne

Dan il-blogg kien ippubblikat minn Newsbook

Bħal lum 4 snin ilu, kont xogħol l-airport. Kien għada baqali l-aħħar siegħa minn tnax biex intemm ix-xift tiegħi u mmur lura d-dar, mal-familja.

F’daqqa waħda tfaċċa grupp imdaqqas ta’ pulizija li bdew mexjin fid-direzzjoni ta’ fejn jien u l-kollegi tiegħi konna bilqiegħda. Ħsibna li ġara xi ħaġa fuq xi ajruplan għax dak il-ħin ma kienx għad hemm passiġġieri fit-terminal.

Iżda l-mixja tal-pulizija waqfet ħdejna. Bdew iduruna wieħed wieħed u waħda waħda, jitolbuna l-mobile. Lili ħallewni għall-aħħar. Iżda kien biss il-mobile tiegħi li riedu.

Kien ġara li l-Kap tal-Komunikazzjoni tal-Gvern Kurt Farrugia u l-kollega tiegħu fil-Ministeru tal-Intern Ramona Attard irraportawni lill-Kummissarju tal-Pulizija. L-akkuża kienet li ħadtilhom ritratt waqt li kienu sejrin lejn Londra u li dar-ritratt bgħattu lil Daphne Caruana Galizia.

Minkejja li m’hemm ebda liġi tipprojbixxi li xi ħadd jieħu ritratt fl-ajruport u minkejja li Daphne Caruana Galizia qatt ma ppublikat ritratt ta’ Farrugia u Attard huma u jsiefru, il-Kummissarju Peter Paul Zammit qagħad fuq li qalulu u minn barra minn Malta (inzerta kien imsiefer) ordna l-arrest immedjat tiegħi u s-sekwestru tal-mobile u ta’ kull apparat elettroniku ieħor li kelli fuqi.

Norman Vella ħiereġ mill-Qorti mal-avukati
Therese Comodini Cachia u Karol Aquilina 

Din hi l-Malta ta’ Joseph Muscat: fejn jiġu jiġru jarrestawk għal ħmerija bħal din iżda r-rivelazzjonijiet tal-Panama Papers, ir-rapporti tal-FIAU, ir-rakkomandazzjonijiet tal-Kummissjoni kontra l-Korruzzjoni u l-għexieren ta’ stejjer ta’ korruzzjoni u abbużi mxandra f’dawn l-aħħar erbgħa snin jinkinsu taħt it-tapit biex jintesew.

Ħmistax-il ġurnata qabel dan l-arrest, kont ftaħt kawża lill-Prim Ministru Muscat għall-vendikazzjoni politika li għamel miegħi meta temmli l-impjieg mal-istazzjon nazzjonali. Dakinhar iddikjarajt bil-ġurament li dil-vendikazzjoni Muscat kien wegħdieli qabel l-elezzjoni, meta kont mort niltaqa’ miegħu bħala ġurnalist fiċ-Ċentru Nazzjonali Laburista.

“Għal kull daqqa li nħossu li qed tagħtu lill-Partit Laburista jien se nagħtikom tnejn, b’saħħti kollha, taħt iċ-ċintorin, fejn iweġġa” kien wissiena Muscat meta kien għadu Kap tal-Oppożizzjoni. Dan huwa l-mod li bih Muscat kien ikellem lill-ġurnalisti li kien iħoss li qed jistaqsu wisq mistoqsijiet.

Qabel xi ħadd jakkużani li qed nivvinta, infakkar li din il-ġrajja kienet konfermata fil-Qorti bil-ġurament minn żewġ xhieda, fosthom l-istess Kurt Farrugia.

Waqt li kont arrestat ħsibt li din kienet it-tpattija ta’ Muscat għax-xhieda tiegħi, li kif mistenni kienet għamlet il-headlines tal-gazzetti kollha. Iżda ma domtx wisq ma ntbaħt li kien hemm iktar minn hekk.

Meta jumejn wara tlajna l-Qorti, kontra tiegħi tela’ l-Kummissarju tal-Pulizija nnifsu. Lanqas fl-iktar każ ikrah ta’ delitt ma jitla’ l-Kummissarju, imma fuq dar-ritratt li qatt m’eżista inħasset il-ħtieġa li jiġi l-Kap tal-Korp tal-Pulizija in persona. U peress illi ta’ dar-ritratt ma kien hemm ebda traċċa mkien, il-Kummissarju Zammit dlonk biddel l-akkuża.

F’daqqa waħda talab lill-Maġistrat tħallieh jaċċessa l-mobile tiegħi biex jinvestiga jekk jien kontx ikkomunikajt b’xi mod ma’ Daphne Caruana Galizia. Lill-Qorti qalilha li ried jiskopri jekk jien kontx is-sors ta’ storja li Caruana Galizia kienet ippubblikat dakinhar tal-arrest. Il-Kummissarju hedded li jekk isib li jien tkellimt ma’ Caruana Galizia, kien se jitlob li nintbgħat massimu ta’ sentejn ħabs u neħel multa ta’ ħamsin elf Ewro!

Norman Vella jpoġġi s-sentenza tal-Qorti fuq l-għatba ta' Kastilja

Għal ftit perspettiva, infakkar li hawn kien qed jitkellem fuq storja mill-aktar banali ta’ żewġ uffiċjali tal-Gvern li qabdu ajruplan għall-Ingilterra u mhux fuq xi każ ta’ korruzzjoni jew xi kumpanija moħbija l-Panama.

Issa kien ċar li l-arrest tiegħi kien ġara minħabba Daphne. Riedu jkunu jafu jekk kontx sors tagħha u riedu jwasslu messaġġ lil kull sors li kellha biex jieqaf jgħaddilha l-informazzjoni.

Il-Maġistrat tat is-sentenza dakinhar stess u lill-Kummissarju Peter Paul Zammit qaltlu ċar u tond li ma kien hemm ebda suspett raġjonevoli li għalih kellu jsir l-arrest u l-pantomima kollha li segwiet.

Fl-2013 din l-istorja kienet waħda mill-iktar moqrija fuq il-gazzetti online. Illum, fir-raba’ anniversarju tagħha, tidher ridikola ħdejn dak kollu li segwa.

Ewlenin fost ħafna oħrajn il-bejgħ taċ-ċittadinanza, il-Cafè Premier, l-art fiż-Żonqor, is-suldat tal-azzar Cyrus Engerer, l-Australia Hall, ix-xufier tal-Ministru li ħareġ jispara fuq karozza, Strada Zekka, Sai Mizzi, karozza bomba wara l-oħra u ħadd ma jinqabad, visas u permessi ta’ residenza bil-korruzzjoni, iż-żjarat fl-Ażerbajġan mingħajr uffiċjali tal-Gvern u ġurnalisti, il-bejgħ tal-isptarijiet lil kumpanija b’sidien moħbija, it-tanker tal-gass u l-bejgħ tal-Enemalta liċ-Ċiniżi, il-Panama Papers, ir-riżenja tad-Direttur tal-FIAU, il-korruzzjoni fil-bini tal-iskejjel, tnejn, tlieta, erbgħa, ħames Kummissarji tal-Pulziija, commissions fuq it-tenders tal-Kunsilli Lokali, Egrant, il-Bank Pilatus, l-elezzjoni ġenerali sena qabel iż-żmien u issa l-assassinju brutali ta’ Daphne Caruana Galizia.

Sentejn ilu ddeċidejt li naħfer lil min għaddieni minn dil-bawxata tal-arrest. Onestament ma sibtiex wisq diffiċli, anke għaliex danni kbar ma sofrejtx u din l-istorja mmotivatni nimpenja ruħi fil-politika.

Ħfirt iva, iżda ma nsejtx. Ikun baħnan min jinsa u min ma jitgħallem xejn dwar il-karattri tal-protagonisti fi storja li jkun għadda minnha. Ma nsejtx u wara dak kollu li ġara nħoss il-bżonn li nfakkar x’ġara meta arrestawni minħabba Daphne.

​Illejla l-PBS reġa’ qatel lil Daphne

Dan il-blogg kien ippubblikat minn Newsbook

Fil-jum li fih il-Parlament Ewropew biddel l-aġenda biex wara l-qtil ta’ Daphne Caruana Galizia jiddiskuti l-ħarsien tal-ġurnalisti, tal-libertà tal-istampa u l-espressjoni ħielsa f’Malta; fil-ġurnata li fiha kien hawn f’pajjiżna Kummissjoni Taljana Anti-mafja;

Jumejn biss wara li eluf ta’ Maltin ħonqu t-toroq tal-Belt Valletta jitolbu ġustizzja; wara li s-soċjetà ċivili talbet għat-tneħħija tal-Kummissarju tal-Pulizija u tal-Avukat Ġenerali; wara l-protesti spontanji quddiem id-Depot tal-Pulizija; wara d-dibattiti mqanqla li saru fil-Parlament Malti;

U fl-istess waqt li dak kollu li ġara u li qed jiġri f’pajjiżna qed jissemma’ bi prominenza u qed jiġi diskuss u analizzat f’gazzetti, portals, bulettini tal-aħbarijiet u programmi ta’ ġrajjiet kurrenti madwar id-dinja kollha;

Isiru l-għaxra u kwart ta’ filgħaxija, taqliblu fuq l-istazzjon nazzjonali biex tara l-programm ta’ ġrajjiet kurrenti li tipproduċi l-Kamra tal-Aħbarijiet, preżentat minn ħadd ħlief il-Kap tal-istess Kamra tal-Aħbarijiet, u ssib intervista maċ-Chairman Eżekuttiv tal-Awtorità tal-Ippjanar!

Qlibtlu fuq TVM biex nara l-iktar clips qawwija mid-dibattitu tal-lum fil-Parlament Ewropew, siltiet minn dak li ntqal fil-Parlament Malti matul dil-ġimgħa, intervisti ma’ nies li ħarġu jipprotestaw u analiżi u diskussjoni dwarhom.

Ħsibt li se nara l-ġurnalisti ta’ TVM jiġru għall-kummenti tal-Kummissarju tal-Pulizija u tal-Avukat Ġenerali.

Minflok sibt ma’ wiċċi lil Reno Bugeja li bla ebda mistħija ta’ xejn injora kollox u ġab mistieden u ddiskuta suġġett li seta’ ddiskuta f’kull ġurnata oħra tas-sena.

Qtil politiku ieħor, din id-darba b’eluf ta’ xhieda.

Illejla quddiem għajnejn kulħadd, id oħra tal-istat, istituzzjoni oħra mħallsa minn flus il-poplu li d-dmirijiet u l-obbligi tagħha huma biss lejn il-poplu, reġgħet qatlet lil Daphne biex isservi lil min iridna ndawru ħarsitna u ma nitkellmux iktar fuqha u fuq xi jfisser tassew l-assassinju tagħha.

L-agħar żmien ta’ pajjiżna

Dan il-blogg kien ippubblikat minn Newsbook

F’pajjiżna m’għandna ebda theddida għal-libertà tal-espressjoni; m’għandna ebda theddida għas-saltna tad-dritt; m’għandna ebda theddida għad-demokrazija.

Dak li qed ngħixu llum m’għadux aktar theddid. Dan huwa ż-żmien li fih dan it-theddid qed jitwettaq, bl-iktar mod vili, bl-iktar mod oxxen u issa bl-iktar mod vjolenti immaġinabbli. U qed jitwettaq fid-deher, fid-dawl tax-xemx, f’wiċċ kulħadd, mingħajr ebda mistħija, mingħajr ebda skruplu ta’ xejn.

Id-dinja kollha llum qed tħares lejn pajjiżna bħala pajjiż li fih ġurnalista tista’ tinqatel bl-iktar mod spettakolari possibbli, biex joqtluha u kulħadd jara, biex ibiċċruha u kulħadd jitwerwer, biex jeliminawha u kulħadd jiskot.

Id-dinja kollha qed tara stat Malti li naqas bil-goff fid-dover tiegħu li jipprevjeni li dan iseħħ. U qed tara li għal darb’oħra ebda responsabbiltà mhi se tinġarr, minn ħadd.

Din hija l-istess dinja li fl-aħħar snin kull meta lemħet isem Malta fil-midja, ratu assoċjat ma’ skandli ta’ nies li l-ewwel ħaġa li għamlu malli ħadu l-poter kienet li marru jiftħu kumpaniji sigrieti fejn jinħbew il-flus. U waqt li dawk kollha li ċappsu lil pajjiżna b’din it-tebgħa għadhom poġġuti fuq it-tron tal-poter, il-ġurnalista li kixfithom, ilbieraħ poġġiet fuq bomba li tertqitha biċċiet u li magħha tertqet biċċa minna lkoll.

Żmien agħar minn dan f’pajjiżna jien m’għixtu qatt.

Għax il-mistoqsija li qed nagħmlu llum m’għadhiex jekk aħniex ngħixu f’pajjiż normali jew le.  Il-mistoqsija hija jekk dan li qed ngħixu sarx in-‘normali’ ta’ pajjiżna. U t-tweġiba tkexkixni aktar mix-xena li rajt ilbieraħ fil-Bidnija.

Għax dak li d-dinja mhix qed tara u qed nilmħu aħna li ngħixu hawn hija dik in-nofs tbissima fuq fomm xi wħud li ddardarlek l-istonku. Konna ħsibna li missejna l-qigħ meta rajna grupp ta’ nies jiċċelebraw quddiem bank protagonist fi storja ta’ ħasil ta’ flus. Mur għidilna li ftit xhur wara kien se jkun hemm min fostna se jasal jiċċelebra anke assassinju feroċi.

U meta dawn iċ-ċelebrazzjonijiet jaslu anke minn Surġent tal-Korp tal-Pulizija, tasal il-konferma krudili ta’ dak li tassew hu pajjiżna llum. Meta quddiem xeni bħal dawn issib min jgħidlek ‘imma’ jew ‘stednitha’ tibda taqta’ qalbek mill-iktar valuri bażiċi li tkun mingħalik kulħadd xorob mal-ewwel treddiegħ t’ommu.

Iqabbadni l-bard il-ħsieb li rrid inrabbi lil uliedi f’pajjiż hekk, f’soċjetà li tista’ b’xi mod tasal taċċetta jekk mhux tiġġustifika jew tapprova dan kollu.

Kont għadni nilbes il-ħarqa dakinhar tat-Tnejn l-iswed tal-1979. Meta ħafna snin wara, f’żogħżiti, xejjirt il-bandiera Maltija flimkien mal-bandiera tal-Unjoni Ewropea kont ċert li l-Malta ta’ tfuliti kienet saret biss rikordju li se nkun nista’ nerġa’ ngħixu biss fil-kotba tal-istorja.

Iżda kont żbaljat.

F’għajnejn id-dinja llum pajjiżna sar jixbaħ aktar lil dawk il-pajjiżi ddominati mill-kriminalità organizzata fejn l-istat huwa assenti għax kompliċi jew impotenti. F’għajnejna jista’ biss ikollna dmugħ u rabja għal dan li huwa l-agħar żmien ta’ pajjiżna.

Passport Junkies: is-surplus li ma jeżistix

Dan il-blogg kien ippubblikat minn Newsbook

Fil-Budget sirna nafu li s-surplus li tant ilu jiftaħar bih il-Gvern jiddependi fuq kemm jirnexxielna nbiegħu passaporti. Fi żmien li fih l-ekonomija dinjija rkuprat mill-ikbar kriżi finanzjarja tal-aħħar mitt sena u bil-prezz taż-żejt fiss f’livell baxx, ir-riċetta mlaqqma Muscatonomics ġabet lill-pajjiżna dipendenti fuq kemm jirnexxielna nsibu multi-miljunarji lesti jħallsu għal passaport li jiftħilhom il-bibien tal-Unjoni Ewropea.

Aħna u nagħmlu l-kontijiet ma rridux ninsew li dawn huma s-snin li matulhom pajjiżna għandu biljun, mija u tmienja u għoxrin miljun Ewro x’jonfoq u x’jinvesti minn fondi Ewropej li nnegozja Gvern Nazzjonalista lejliet l-elezzjoni tal-2013.

Dan huwa wkoll żmien li fih il-Gvern fetaħ idejh bħal qatt qabel għall-iżvilupp, bil-prezzijiet tal-propjetà u tal-kirjiet jisplodu ‘l fuq.

Realtà oħra ta’ dan iż-żmien hija n-numru rekord ta’ ħaddiema barranin li qed jipproduċu, jħallsu t-taxxa, jikru l-propjetà u jonfqu ħafna minn flushom f’pajjiżna.

Dawn il-fatturi, flimkien ma’ oħrajn, jirriżultaw fi tkabbir tal-ekonomija. Iżda issa sirna nafu li dan it-tkabbir mhux iservina biex insostnu l-ispiża tal-Gvern.

Minkejja l-ftaħir kollu minn fuq il-podium armat quddiem Kastilja, Muscat u Scicluna qed ikollhom jistennew lil xi proxxmi jixtru passaport Malti għalihom u għal qrabathom biex jibbilanċjaw il-kotba.

Waqt li l-bumbardament minn reklami tas-surplus ineżistenti u ta’ ekonomija li issa nafu hija addict ta’ skema ta’ bejgħ taċ-ċittadinanza ma jaqta' xejn, aħna u nħarsu madwarna ħlief deficit ma narawx, minn x’ħin niftħu għajnejna filgħodu sa x’ħin nagħlquhom tard filgħaxija.

Għandna deficit fit-toroq tagħna, bit-traffiku jiżdied b’mod eżaġerat u bil-Gvern jirrispondi billi jċekken ftit roundabouts u jagħti ftit biljett tal-linja b’xejn.

Għandna deficit fl-infrastruttura fejn il-Gvern waqaf jinvesti u l-uniċi proġetti li għadek tara huma investiment fil-kruha u f’inqas spazji miftuħa, bl-uniku skop tagħhom ikun li jitħaxxnu l-bwiet tal-ftit.

Għandna deficit fl-iskejjel. Mhux talli lanqas għadna kapaċi nibnu skola ġdida fis-sena, talli l-Gvern lanqas għadu kapaċi jwettaq dak li jippjana hu stess. Għandna deficit anke fil-klassijiet, fejn lanqas għadna nsibu għalliema biex jgħallmu lil uliedna.

Għandna deficit kbir fl-ambjent, mhux biss fl-ambjent naturali, imma anke fl-ambjent fl-irħula u fl-ibliet tagħna. Fejn huma l-investiment fi spazji u ġonna pubbliċi ġodda, bankini u postijiet oħra ta’ rikrejazzjoni għall-familji?

Għandna deficit saħansitra fl-iskart li wasslitna f’sitwazzjoni fejn ma nafux x’se naqbdu nagħmlu bl-iskart li se nkunu qed nipproduċu għada u pitgħada.

Għandna deficit anke fil-fama u fir-reputazzjoni ta’ pajjiżna. U jekk nibdew nitkellmu fuq id-deficit li ħolqot din l-amministrazzjoni fil-governanza u fis-saltna tad-dritt ikollna nagħmlu diskors ferm itwal minn dak moqri mill-Ministru Scicluna nhar it-Tnejn fil-Parlament.

Għandna deficit fil-bwiet tal-familji li jaqilgħuha u jiekluha bi prezzijiet dejjem jogħlew tal-ikel u tal-bżonnijiet essenzjali ta’ kuljum. Għandna deficit soċjali li qed jherri s-sinsla tas-soċjetà tagħna.

Għandna deficit fil-futur, b’ebda viżjoni għas-suq tax-xogħol u għall-ekonomija ta’ għada.

Imma l-aqwa li Muscat u Scicluna jieħdu injezzjoni ta’ flus mill-iskema tal-bejgħ taċ-ċittadinanza u bi tbissima jgħidulna li dan hu l-aqwa żmien għax għandna surplus li fil-fatt ma jeżistix. Jekk jew b’hekk x’ħin jgħaddi l-effett ta’ dawn l-injezzjonijiet u l-junkie jibda ġej f’sensieh u jara d-dinja kif fil-fatt hi, huma jkunu daħlu fil-kotba tal-istorja.

Don Quixote u l-leave għall-IVF

Dan il-blogg kien ippubblikat minn Newsbook

Hemm bosta raġunijiet li għalihom nisa u koppji li jixtiequ jsiru ġenituri jirrikorru għal IVF barra minn xtutna. Aktar iva milli le, dawn ir-raġunijiet ikunu marbuta mal-limitazzjonijiet li tipprovdi l-liġi li ilha tirregola din il-proċedura medika għal dawn l-aħħar ħames snin.

Iva, sewwa qrajt: ħames snin. Qabel l-2012 ma kellniex liġi li tirregola x’jista’ u x’ma jistax isir f’pajjiżna. Dan ifisser li dak kollu li llum hawn min qed iwerwer lin-nies minnu, taħt gvernijiet immexxija mill-PN seta’ jsir bla ebda problema u bla ebda konsegwenza.

Mhux qed ngħid li kull ma jsir f’pajjiżi oħra huwa tajjeb jew li m’għandux ikun hemm diskussjoni serja dwaru, speċjalment fuq livell etiku u morali. Iżda huwa stat ta’ fatt li kien biss fl-aħħar ġimgħat tal-Gvern immexxi minn Lawrence Gonzi li l-Att dwar il-Protezzjoni tal-Embrijuni ġie approvat fil-Parlament u l-IVF ġie regolat.

Lura għal-lum, hawn min minħabba dak li jipprovdi dan l-Att ma jistax jagħmel IVF b’suċċess hawn Malta. Fost dawn issib min jirrassenja ruħu. Iżda ssib ukoll oħrajn li jonfqu flejjes kbar u jirrikorru għal din il-proċedura barra minn Malta, f’pajjiżi fejn hemm liġijiet differenti li jippermettu affarijiet li hawn huma projbiti.

Ir-riżultat ta’ dawn il-proċeduri li f’pajjiżna huma llegali huwa li dawn in-nisa u dawn il-koppji Maltin isiru ġenituri.

Kemm ilni nsegwi d-dibattiti dwar din l-issue qatt ma smajt lil ħadd jargumenta li lil dawn l-ommijiet ġodda għandna narrestawhom u nressquhom il-Qorti malli jaslu lura Malta! Lanqas qatt ħadd ma qal li għandna nċaħħdu lit-trabi tagħhom miċ-ċittadinanza Maltija sempliċiment għax kienu konċepiti bi proċedura medika li f’Malta hija llegali!

Bil-maqlub, dawn l-ommijiet dejjem ibbenefikaw mid-drittijiet kollha li għandhom l-ommijiet l-oħra, inkluż il-leave tal-maternità u inċentivi oħra li joħorġu mil-liġi tax-xogħol u liġijiet oħrajn.

Allura skantajt mhux ftit meta qrajt li hemm min irid li l-mitt siegħa leave żejda li se jkunu qed jingħataw il-ħaddiema li jkunu għaddejin minn proċedura ta’ IVF, ma jingħatawx indiskriminatament lill-ġenituri prospettivi kollha.

Mozzjoni mressqa mill-Grupp Parlamentari Nazzjonalista prattikament trid iċċaħħad dan il-leave lill-koppji tal-istess sess, lil nisa single u lil koppji oħrajn li jeħtieġu trattament differenti minn dak permess mil-liġi Maltija.

Fl-istess nifs li qed iressaq din il-mozzjoni, il-kelliem tal-Grupp ġie kwotat jgħid li ma jrid iċaħħad lil ħadd milli jkollu l-ulied. Bħal dak li qallu li hawn xi ħadd qed jistenna l-permess ta’ xi politiku jew ieħor biex jagħmel appuntament ma’ klinika barra minn Malta, jaqbad ajruplan u jagħmel IVF!

Argument ieħor li sar kien li m’għandniex ngħinu lil min jirrikorri għal IVF b’reġim legali differenti min tagħna. Għax tafu intom, mara li bi ħsiebha tonfoq ġidha, tagħmel disgħa xhur tqala, twelled u trabbi tarbija se taqta’ qalba għax ma jkollhiex mitt siegħa leave mix-xogħol!

Ovvjament il-Gvern se jibqa’ għaddej b’dan l-Avviż Legali u l-uniku skop li se jkun intlaħaq minn min qed jopponih se jkun ġlieda oħra bla bżonn mitlufa fuq kull front.

Ma narax li hemm loġika politika u prattika li tista’ twassal biex partit jipprova jċaħħad lill-ħaddiema minn dritt li se jingħatalhom biex jiffaċilitalhom ħajjithom f’mument daqstant delikat.

Partit politiku m’għandux jirrendi ruħu bħall-karattru Don Quixote li kien mingħalih qed jiġġieled u jegħleb għadu kbir u feroċi, waqt li kulħadd kien qed jiddieħek bih jarah jissara ma’ sempliċi mitħna tar-riħ.

Naf li hemm bosta Deputati Nazzjonalisti li bħali ma jsibu ebda oġġezzjoni għal dan l-Avviż Legali.

Fl-aħħar mill-aħħar dawn huma l-istess nies li daħħlu fil-Kostituzzjoni l-prinċipju li ħadd m’għandu jkun diskriminat minħabba l-orjentazzjoni sesswali tiegħu jew tagħha.

Dawn id-Deputati għandhom jingħataw l-ispazju kollu biex jesprimu ruħhom kemm bil-fomm u kif ukoll bil-vot tagħhom fil-Parlament. Jeħtieġ li l-Partit Nazzjonalista jibqa’ jirrappreżenta l-ilwien kollha tas-soċjetà tagħna.