Fabbrikazzjoni

Artiklu ppubblikat fil-gazzetta IN-NAZZJON tat-Tnejn 12 ta' Mejju 2014

L-istorja tal-fabbrika tal-kanċer li tant qalilna Joseph Muscat qabel l-aħħar elezzjoni ġenerali ma kienetx għajr fabbrikazzjoni. Illum għandna l-provi li dak li tant għajjar bih lill-Gvern Nazzjonalista qabel l-aħħar elezzjoni ġenerali ma kienx għajr gidba ħoxna.

Nhar l-Erbgħa l-Eurostat ippubblikat figuri li juru li s-sena li għaddiet l-emissjonijiet fl-arja ta’ carbon dioxide (CO2) naqsu b’6.8%. Dan ifisser tnaqqis ta’ 184,000 tunnellata ta’ emissjonijiet fl-arja tagħna.

U dan kollu ġara bl-investiment li Gvern Nazzjonalista għamel f’power station ġdida li tant kienet ikkritikata mill-Partit Laburista.

L-iktar li tiddiżgustani f’din l-istorja kollha hija li Muscat ma skrupla xejn juża l-marda tal-kanċer, li tant iġġib tbatija, biex jagħmel il-kampanja qarrieqa tiegħu.

Fiż-żmien li ġej nistennew li l-emissjonijiet ikomplu jonqsu wkoll bis-saħħa ta’ investiment li Gvern Nazzjonalista għamel bl-għajnuna ta’ fondi Ewropej – l-interconnector bejn Malta u Sqallija.

Grazzi għal dawn l-investimenti l-Enemalta qiegħda wkoll tiffranka l-flus. Kien il-Gvern Laburista stess li stqarr li l-power station li ħalla Gvern Nazzjonalista tant hija iktar effiċjenti li permezz tagħha l-Enemalta qed tiffranka miljun Ewro fil-ġimgħa.

UNJONI EWROPEA

Il-Prim Ministru jrid jiffabbrika wkoll l-istorja li għaddejna minnha. Il-ġimgħa l-oħra reġa’ qal li fl-2003 il-Partit Laburista kien irrikonoxxa l-għażla tal-poplu favur sħubija fl-Unjoni Ewropea. Joseph Muscat irid inessina l-famuża dikjarazzjoni ta’ sieħbu Alfred Sant li kien ħareġ jgħid li r-referendum intrebaħ mill-Partnership.

Muscat iridna nħassru l-memorja li għadha ċara f’moħħna taċ-ċelebrazzjonijiet li saru dakinhar quddiem il-kumpless tas-Super One (fejn kien jaħdem hu) fil-Marsa.

Muscat iridna ninsew ukoll li d-Deputati kollha tal-Partit Laburista fil-Parlament kienu ivvotaw kontra t-Trattat ta’ Sħubija fl-Unjoni Ewropea. Dan minkejja r-riżultat tar-referendum u minkejja li dan ir-riżultat kien konfermat b’elezzjoni ġenerali. Joseph Muscat innifsu kien ta partir lid-Deputati tal-Labour biex jivvotaw kontra fil-Parlament.

Wara li ttieħed il-vot, Joseph Muscat kiteb fil-ġurnal ‘l-orizzont’ u stqarr li “ħadt pjaċir li l-Grupp Parlamentari Laburista ddeċieda li jivvota kontra t-Trattat tas-Sħubija ta’ Malta fl-Unjoni Ewropea. Kont ilni ġimgħat sħaħ nikteb favur li l-partit jieħdu din il-pożizzjoni, jiġifieri li jivvota kontra… B’din il-pożizzjoni, qegħdin inkunu fidili lejn dawk kollha li vvotaw għall-Partit Laburista. Ħriġna ta’ nies ta’ kelma ma’ dawn il-persuni.” (25 ta’ Ġunju 2003)

PROTESTA

Fabbrikazzjoni oħra ta’ Muscat hija li Gvern Laburista raħħas il-prezzijiet tal-fuels u tal-gass. Il-verità hi li l-prezzijiet li għadu kif ħabbar b’tant pompa l-Prim Ministru huma ferm iktar għoljin minn meta l-istess Joseph Muscat, bħala Kap tal-Oppożizzjoni, niżżel in-nies jipprotestaw fit-toroq tal-Belt Valletta qabel l-aħħar elezzjoni ġenerali.

Illum il-prezz ta’ litru petrol huwa 13-il ċenteżmu iktar minn dakinhar. Illum litru diesel iqum 15-il ċenteżmu iktar minn dakinhar. Illum ċilindru gass ta’ 12-il kilogramma jqum €1.10 iktar minn dakinhar.

Minfuq Joseph Muscat iridna ngħidulu grazzi!

EŻAĠERAZZJONI

Flimkien mal-Viċi Kap Beppe Fenech Adami, mad-Deputat Marthese Portelli u mal-Kandidat Kevin Plumpton, ħadt sehem f’konferenza għall-aħbarijiet quddiem Kastilja. Lejliet iltqajna biex niddiskutu dak li konna se nħabbru lill-ġurnalisti. Ma konniex se nkellmuhom fuq żewġ ċenteżmi imma fuq 8 miljuni u nofs – 8 miljuni u nofs aktar fis-sena minn flusek biex Muscat isostni l-ikbar kabinett fl-istorja ta’ pajjiżna.

Aħna u niddiskutu ftakart fi programm li kont għamilt qabel l-aħħar elezzjoni ġenerali. F’isem il-Partit Laburista kien qed jieħu sehem dak li kien il-Whip tal-Grupp Parlamentari, Carmelo Abela. Id-diskussjoni kienet dwar il-ħlas tal-politiċi.

Niftakarni nargumenta ma’ Carmelo Abela li jekk il-Ministri ma jieħdux l-onorarja, iżda jiżdied in-numru ta’ Ministri u Segretarji Parlamentari, il-poplu se jkun qed iħallas iktar. Għidtlu li jekk ikun hemm bejn 15 u 20 membru fil-Kabinett l-ispiża se tkun ferm akbar. Niftakar lil Abela joġġezzjona għal dan in-numru. Qalli biex ma neżaġerax għax jekk neżaġera tikber in-nefqa.

Ftit ġimgħat wara dan il-programm Muscat ħatar kabinett ta’ 23 Ministri u Segretarji Parlamentari. Spiża ta’ 100 miljun Ewro f’ħames snin. X’eżaġerazzjoni! 

NILTAQGĦU

F’dawn il-ġimgħat ta’ kampanja elettorali qed nieħu gost ħafna niltaqa’ magħkom u nisma’ dak li għandkom xi tgħidu. Żort kull lokalità f’Malta u Għawdex iżda ovvjament ma stajtx niltaqa’ ma’ kulħadd. Għal dawk li jixtiequ jiltaqgħu miegħi qabel l-elezzjoni tal-Parlament Ewropew se nkun qed norganizza l-aħħar żewġ laqgħat f’każini tal-Partit Nazzjonalista kif ġej: Nhar l-Erbgħa 14 ta’ Mejju se nkun iż-Żurrieq u t-Tlieta 20 ta’ Mejju se nkun Ħaż-Żebbuġ. Iż-żewġ laqgħat jibdew fit-8pm.

Naturalment se nkun qed nattendi wkoll għall-attivitajiet kollha li se jkun qed jorganizza l-Partit Nazzjonalista f’dawn il-ġranet. Narakom!