L-aħbar it-tajba

Artiklu ppubblikat fil-gazzetta ILLUM tal-Ħadd 4 ta' Mejju 2014

L-aħbar it-tajba li tant żammna mdendlin nistennew il-Prim Ministru Joseph Muscat ma kienet xejn għajr prova oħra ta’ kemm dan il-Gvern qed jipprova jgħaddi n-nies biż-żmien.

Ibda biex il-konferenza għall-aħbarijiet li għamel nhar l-Erbgħa l-Prim Ministru ħaditni lura fi tfuliti. Dak iż-żmien il-Gvern kien jgħoxa jħabbar lill-poplu l-prezz ta’ landa corned beef, bott tonn taż-żejt u l-kumplament tax-xirja. Kien ukoll f’dak iż-żmien, xi tletin sena ilu, l-aħħar li smajt Prim Ministru jitkellem fuq il-milleżmi.

Ngħid id-dritt, dak iż-żmien ma konniex nafu aħjar. Iżda mur għidli li tletin sena wara kelli nerġa' nara Prim Ministru Malti jsejjaħ lill-ġurnalisti biex iħabbar roħs fil-petrol ta’ 7 milleżmi (tal-Lira Maltija).

Biex tkompli tgħaxxaqha dawn is-7 milleżmi li raħħas huma l-istess 7 milleżmi li l-Prim Ministru kien għolla xahar qabel. Din iż-żieda fil-prezz tal-petrol kienet tħabbret b’sempliċi stqarrija maħruġa mill-Enemalta fl-aħħar ta’ Marzu. Xahar eżatt wara l-Prim Ministru ħass li kellu jsejjaħ lill-ġurnalisti u jarma warajh il-bnadar ta’ Malta u tal-Unjoni Ewropea biex iħabbar li raħħas il-petrol bl-istess 7 milleżmi li hu stess, b’sempliċi stqarrija, kien għolla xahar qabel.

L-ingann huwa ikbar minn hekk. Bi ftit minuti ta’ riċerka fuq l-internet sibt li l-prezzijiet li kien għadu kif ħabbar il-Prim Ministru huma ħafna iktar għoljin minn meta l-istess Joseph Muscat, bħala Kap tal-Oppożizzjoni kien niżżel in-nies jipprotestaw fit-toroq tal-Belt Valletta għax il-prezzijiet tal-fuel kienu għoljin eżagerati.

Fil-fatt il-prezz ta’ litru petrol illum huwa 13-il ċenteżmu iktar minn meta Joseph Muscat bħala Kap tal-Oppożizzjoni niżżel in-nies jipprotestaw fit-toroq f’Jannar 2011. Il-prezz tad-diesel ukoll huwa iktar għoli. Meta Muscat bħala Kap tal-Oppożizzjoni niżżel in-nies jipprotestaw fit-toroq id-diesel kien 15-il ċenteżmu orħos għal kull litru milli hu llum.

Dakinhar li l-prezz kien ferm orħos mil-lum, Joseph Muscat kien qal lill-folla rrabjata li l-prezz huwa għoli minħabba l-ineffiċjenza tal-Gvern u l-korruzzjoni fost oħrajn.

Nhar l-Erbgħa l-Prim Ministru ftaħar li dawn il-prezzijiet se jibqgħu kif inhuma sal-aħħar tas-sena – la se jogħlew u lanqas se jorħsu – jiġri x’jiġri fis-swieq u fir-rati tal-kambju. Dan ifisser li l-Prim Ministru assigura li sal-aħħar ta’ Diċembru lkoll kemm aħna se nkunu qed inħallsu prezz ferm iktar għoli għall-fuel minn meta hu sejjħilna biex nipprotestaw fi Triq ir-Repubblika.

Nhar l-Erbgħa l-Prim Ministru ħabbar ukoll tnaqqis fil-prezz tal-gass. Qalilna li dan it-traħħis se jkun effettiv biss sal-aħħar ta’ Settembru. Issa lkoll nafu li bejn illum  u l-aħħar ta’ Settembru l-konsum tal-gass fid-djar jonqos drastikament u allura tonqos ukoll id-domanda għalih. Fl-ewwel lezzjoni bażika tal-ekonomija jgħallmuk li meta d-domanda tonqos, il-prezz jonqos magħha. Allura Muscat mhu qed jagħmel assolutament xejn speċjali. Anzi, il-probabiltà hi li meta nerġgħu niġu bżonn il-gass f’Ottubru se nsibuh ferm iktar għoli milli ħabbar il-Prim Ministru nhar l-Erbgħa.

Iżda anki dwar il-prezz tal-gass ‘imraħħas’ fittixt u sibt l-ingann. Il-prezz tal-gass il-ġdid li ħabbar il-Prim Ministru Muscat ukoll huwa iktar għoli minn meta hu bħala Kap tal-0ppożizzjoni niżżel in-nies jipprotestaw fit-toroq. Fil-fatt ċilindru gass ta’ 12-il kilogramma llum iqum €1.10 iktar minn dakinhar.

F’attività oħra li saret nhar il-Ġimgħa, il-Prim Ministru ħabbar xi miżuri u inizjattivi li biħsiebu jieħu taħt dik li sejjaħ bħala ‘politika nazzjonali tax-xogħol’.

Proposta li malli taraha taħsibha aħbar tajba hija dik li min jaqla’ biss il-paga minima jingħata ‘top-up’ fi flus mingħand il-Gvern. Bdanakollu, jekk din il-miżura tiġi implimentata kif intqal nhar il-Ġimgħa tkun qed tinħoloq inġustizzja bejn id-diversi kategoriji ta’ ħaddiema li għandhom dħul baxx.

Dan il-għaliex il-ħaddiema li llum jaqilgħu biss ftit iktar mill-paga minima, se jispiċċaw isiru dawk li jaqilgħu l-inqas. Per eżempju, jekk din it-‘top-up’ tkun ta €1,500 fis-sena, dawk li llum jaqilgħu biss €500 iktar mill-paga minima se jispiċċaw jaqilgħu €1,000 inqas minn min qiegħed fuq il-paga minima.

Proposta oħra li tolqot l-għajn hija dik li l-leave tal-maternità jitħallas kollu kemm hu mill-Gvern. Pero’, biex dan ikun jista’ jsir il-Gvern qed jgħid li se jkolli jgħolli l-bolla li titħallas minn min iħaddem fuq kull ħaddiem.

Personalment naqbel fil-prinċipju li l-leave tal-maternità għandu jitħallas mill-istat, kemm fis-settur pubbliku, kif ukoll fil-privat, iżda ma naħsibx li dan huwa l-mument opportun li fih jiżdied il-ħlas tal-bolla lil min iħaddem.

L-ewwel dritt fundamentali li għandu kull ħaddiem huwa li jkollu x-xogħol. Għaldaqstant nappella lill-Gvern biex jistudja bir-reqqa l-miżuri li qed jipproponi sabiex qabel idaħħalhom fis-seħħ ikun ċert mill-impatt li se jkollhom. Il-Gvern għandu jkun ċert li dak li se jagħmel ikun tassew ta’ ġid għall-ħaddiema kollha u m’għandux jipprova juża lill-ħaddiema, b’mod speċjali lil dawk li jaqilgħu l-inqas, għall-iskopijiet elettorali tiegħu.