F’din il-kampanja
elettorali mimlija “enerġija pożittiva”, il-Prim Ministru Joseph Muscat
iddeskriva l-25 sena li pajjiżna u l-poplu tagħna għamel taħt tmexxija ta’
Gvernijiet Nazzjonalisti bħala “kastig”. Biex inkun preċiż huwa qal lill-folla
ta’ partitarji Laburisti miġbura f’Ħal Tarxien li min minnhom ma jmurx jivvota
fl-elezzjoni ta’ nhar is-Sibt li ġej se jkun qed “jagħmel pjaċir lil min
ikkastigah għal 25 sena sħaħ”.
Din id-dikjarazzjoni
tal-Prim Ministru tfisser li kull min ivvota lill-Partit Nazzjonalista fl-1992,
fl-1998, fl-2003 u fl-2008 għażel Gvern li kien qed jikkastigah. Fost dawn
il-“kastigi” hemm il-kisba tad-demokrazija, il-pluraliżmu fix-xandir,
il-ħolqien ta’ eluf ta’ postijiet tax-xogħol, il-kisba tal-libertà, l-eluf ta’
proġetti li mmodernizzaw lil pajjiżna, il-twelid u t-tisħiħ tal-kunsilli
lokali, il-liberalizzazzjoni tal-ekonomija, l-eluf ta’ operazzjonijiet u
servizzi oħra tas-saħħa fi sptar u faċilitajiet state of the art, il-ftuħ tal-Università għal kulħadd, il-ftuħ
mill-ġdid tal-MCAST u l-bini ta’ iskejjel ġodda mimlijin apparat u faċilitajiet
moderni u mitt ħaġa oħra.
Fost dawn
il-“kastigi”, 10 snin ilu kellna wkoll l-isħubija ta’ Malta fl-Unjoni Ewropea.
UNJONI
EWROPEA
Fil-kampanja referendarja għall-isħubija ta’
Malta fl-Unjoni Ewropea Joseph Muscat kien sejjaħ is-sħubija “is-salib
tal-millennju”. Wara r-referendum Muscat ftaħar li l-vot tiegħu poġġieh fi
frame. Illum, 10 snin wara, Muscat bħala Prim Ministru ta’ pajjiż membru
fl-Unjoni Ewropea qed isejjaħ l-isħubija “kastig”.
Għall-Prim Ministru l-mijiet ta’ kilometri ta’
toroq ġodda li saru bl-għajnuna ta’ fondi Ewropej huma “kastig”. Għal Muscat
l-MCAST il-ġdid u l-isptar tal-kura tal-kanċer li dalwaqt se jiftaħ hu huma
riżultat ta’ “kastig”. Għall-Prim Ministru l-eluf ta’
studenti Malti li qed jistudjaw f’pajjiżi oħra tal-Unjoni Ewropea qed jiġu
“kastigati”.
Skont il-Prim Ministru
l-investiment enormi li sar fit-tisfija tad-drenaġġ li b’riżultat tiegħu
għandna l-iktar baħar nadif fil-Mediterran huwa “kastig”. L-istess jaħsibha
l-Prim Ministru dwar l-investiment qawwi bl-għajnuna ta’ fondi Ewropej
fl-Università, fil-qasam tas-saħħa, fil-provvista tal-enerġija, fit-trattament
tal-iskart, fl-ispazji pubbliċi, fir-restawr ta’ bini u wirt storiku u fis-swar
tal-bliet tagħna fost ħafna proġetti oħrajn.
Skont il-Prim Ministru
Joseph Muscat huwa “kastig” il-fatt li llum għandna l-munita Ewro fil-but.
Skont Dr Muscat huwa “kastig” il-fatt li llum għandna suq ta’ 500 miljun ruħ
fejn nistgħu nbiegħu l-prodotti u s-servizzi tagħna mingħajr xkiel. Għall-Prim
Ministru huwa “kastig” li llum tista’ tivjaġġa liberament u anke taħdem
fil-pajjiżi kollha tal-Unjoni Ewropea. Skont Joseph Muscat huma “kastig”
l-għajnuniet għall-industriji tagħna u l-ħolqien ta’ eluf ta’ postijiet
tax-xogħol li nħolqu f’niċeċ ġodda li ma kienux ikunu possibbli kieku għażilna
triq oħra għal pajjiżna.
Il-Prim Ministru
Joseph Muscat imissu jistħi li għamel dikjarazzjoni bħal din. Il-Prim Ministru
m’għandu l-ebda dritt jipprova jibdel l-istorja li għixna flimkien. Muscat m’għandu
l-ebda dritt jinsulenta l-memorja tagħna b’dan il-mod.
ELITE
Tassew ma setgħux isibu slogan iktar addattat għal billboard tal-Gvern Laburista.
KURAĠĠ
Dan huwa l-aħħar
artiklu tiegħi qabel l-elezzjoni ta’ nhar is-Sibt li ġej. L-islogan li għażilt għal
din il-kampanja huwa ‘Kuraġġ’. Għażilt din il-kelma għax kienet l-iktar waħda li għidtuli intom meta
matul dawn ix-xhur kont qed naqla’ d-daqqiet taħt iċ-ċintorin mingħand il-Gvern
tal-Prim Ministru Joseph Muscat.
“Kuraġġ” għidtuli meta ltqajtu miegħi u taptaptuli fuq dahari. “Kuraġġ”
ktibtuli fuq Facebook u fuq il-messaġġi li bgħattuli fuq il-mobile.
Kontu intom li għamiltuli kuraġġ meta l-Gvern Laburista neħħieni
mix-xandir u fetaħ attakk feroċi fuqi bil-media
biex jiġġustifika d-deċiżjoni vendikattiva li kien ħa.
Kontu intom li għamiltu kuraġġ lili u lill-familja kollha tiegħi meta
sar rapport falz fuqi u ġejt arrestat għalxejn fuq il-post tax-xogħol ftit
ġranet biss wara li ftaħt kawża ta’ diskriminazzjoni politika kontra l-Prim
Ministru Joseph Muscat.
Il-kuraġġ li għamiltuli rrid issa nroddu lura. Kien għalhekk li
ddeċidejt li nidħol għall-kandidatura għall-elezzjoni tal-Parlament Ewropew.
NHAR IS-SIBT
Dan huwa mument diffiċli għall-Partit Nazzjonalista. Dan il-partit ġej
minn telfa elettorali kbira u qed jikkompeti ma’ magna ta’ propaganda qawwija,
sinjura u bla skrupli. Kien jeħtieġ ħafna kuraġġ biex wara sena fl-Oppożizzjoni
nidħlu għal sfida elettorali nazzjonali daqstant diffiċli bħall-elezzjoni
tal-Parlament Ewropew.
B’kuraġġ, il-ħdax-il kandidat, it-tmexxija, l-amministrazzjoni u
l-mijiet ta’ voluntiera Nazzjonalisti f’dawn l-aħħar ġimgħat ħadmu bla waqfien
biex nhar is-Sibt nikbu r-riżultat li jixirqilna. Issa jmiss lill-kumplament
tal-poplu li nhar is-Sibt isib il-kuraġġ u jagħmel id-differenza, bil-vot
tiegħu.
Nhar is-Sibt jeħtieġ li nagħtu sinjal ċar lill-Gvern Laburista u nuruh
li jagħmel x’jagħmel mhux se jintimidana. Bil-vot tagħna rridu ngħidulu ċar u
tond li mhux se nħalluh jirrombla aktar minn fuqna.
Nhar is-Sibt se nagħżlu r-rappreżentanti tagħna fil-Parlament Ewropew.
Il-vot tagħna huwa l-vuċi tagħna. Jeħtieġ nagħżlu vuċijiet kuraġġużi, li ma
jbaxxux rashom għad-diktat tal-Gvern, imma jkunu tassew rappreżentanti b’saħħithom
tal-poplu kollu, anke f’livell ta’ Unjoni Ewropea.
Il-vot tagħna għandu jservi wkoll bħala vot ta’ fiduċja fil-ħidma ta’
tiġdid li wettaq il-Partit Nazzjonalista fl-aħħar sena. Jeħtieġ nagħtu prova li
dan il-partit huwa ħaj, mimli enerġija u entużjażmu u li huwa lest biex jerġa’
jkun partit rebbieħ.
Bħalma kkonvinċejna ‘l bieraħ jien konvint li nistgħu nikkonvinċu llum u
għada. Bħalma rbaħna ‘l bieraħ jien konvint li nistgħu nirbħu għada.
Kuraġġ.
No comments:
Post a Comment