L-iskandlu Leisure Clothing: Fil-GWU kien hemm min ilu jaf

Persuna midħla tal-istamperija tal-General Workers’ Union qaltli li xi snin ilu ġurnalist tal-gazzetta l-orizzont kien beda jinvestiga l-abbuż tal-ħaddiema Ażjatiċi fil-fabbrika tal-Leisure Clothing. Dak iż-żmien fil-Gvern kien hemm il-Partit Nazzjonalista. 

Din il-persuna qaltli li dan il-ġurnalist ta’ l-orizzont kien sab l-istess abbuż u sfruttament oxxen li nkixef din il-ġimgħa mill-ġurnalist Joe Mikallef ta’ In-Nazzjon. Iżda ġara li din l-istorja qatt ma ġiet ippubblikata fil-gazzetti tal-Union.

Din il-persuna qaltli li uffiċjal għoli tal-General Workers Union kien ta struzzjoni lil dan il-ġurnalist biex ma jippubblika xejn u biex jieqaf jinvestiga minnufih.

L-iskuża li kien ġab dan l-uffiċjal għoli tal-GWU kienet li jekk jinkixef dan l-iskandlu kien se jkun ipperikolat il-post tax-xogħol tal-ħaddiema Maltin ta’ din il-fabbrika, li fil-maġġoranza tagħhom huma membri tal-istess Union.

Issa llum, kif mistenni, is-Segretarju Ġenerali tal-GWU Tony Zarb ikkundanna bla ebda riservi dak li nkixef f'dawn il-ġranet. Filwaqt li ningħaqad miegħu fil-kundanna, nissuġġerilu jaqbeż qabża sal-Marsa jitkellem mal-ġurnalisti tiegħu u jitlobhom jagħtuh aktar dettalji tal-istorja li ntqalet lili.
 

Nittama li Tony Zarb ikollu l-kuraġġ ma jħares lejn wiċċ ħadd u dak li jsir jaf fuq din l-istorja (jekk mhux diġà’ jafu) ma jżommux għalih biss.