Muscat belagħha sa griżmejh

Meta kont nippreżenta TVHemm fuq TVM fl-eqqel tal-kampanja elettorali staqsejt ħafna dwar il-proġett tal-enerġija tal-Partit Laburista. Niftakarni naqla’ bosta tgħajjir u nsulti għax kont nazzarda niddubita xi virgola mill-pjan ta’ Konrad Mizzi u nistaqsi dwaru.

Dak iż-żmien kienet saret moda li l-mistoqsijiet isiru biss lill-kelliema tal-Gvern Nazzjonalista. Kien qisu sar dnub tistaqsi xi ħaġa lil tal-Labour. Agħar minn hekk il-fatti kienu saru xi ħaġa sekondarja. Jekk tkun ġurnalist u ssemmi xi fatt li l-Labour kien iddeċieda li jmeri u jgħawweġ, ħoll xagħrek u ġib iż-żejt. Imma jien u oħrajn, li llum ħadd minna m’għadu fuq TVM, xorta bqajna għaddejjin nitkellmu bil-fatti f’idejna waqt li nistaqsu lill-Gvern li kien qed imut u lill-Gvern li kien qed jitwieled bl-istess mod inkwiżittiv.

U kont nistaqsi kif jista’ jkun li din il-power station ta’ Konrad titlesta’ fi żmien sentejn meta kull min jifhem kien qed jgħid li din hija impossibbli. Ir-risposta kienet dejjem tkun assigurazzjoni ċara u bla tlaqlieq. Illum nafu li dan mhux se jsir.

Kont nistaqsi dwar fejn se jinħażen il-gass għal din il-power station u kif se jinġieb f’pajjiżna. U qalulna li kollox għandhom ippjanat sal-inqas dettall, vapuri u tankijiet inklużi. Wara l-elezzjoni tfaċċa pjan differenti - tanker ankrat fil-port b’ħażna enormi ta’ gass dejjem abbord.

Kont nistaqsi kif jista’ jkun isir ftehim fuq prezz fiss tal-gass għal 10 snin meta dawn it-tip ta’ kuntratti ilhom snin twal ma jsiru. Ir-risposta ta’ Konrad Mizzi dejjem kienet li l-ftehim se jsir għal 10 snin. Kien saħansitra wegħdni li se jġibli kuntratt identiku għal dak li kellu f’moħħu biex jurini li m’għandix raġun. Dan il-kuntratt qatt ma ġie u llum li Mizzi sar Ministru qed jitlob rabta għal nofs dak li wiegħed, jiġifieri 5 snin. U lanqas għal 5 snin għadu ma rnexxielu jiftiehem!

Kont nistaqsi fuq kif il-kontijiet kellhom jorħsu permezz ta’ rigal ta’ 30 miljun li l-konsorzju privat kien se jkun mistenni jħallas bil-quddiem. Konrad Mizzi kien iħares lejja b’espressjoni li ttik x’tifhem li hu jifhem u jien tuba u jserraħli moħħi li jaf x’inhu jgħid u li hekk se jkun. Illum nafu li dawn it-30 miljun ma ġewx u m’humiex ġejjin.

Kont nistaqsi ħafna iktar affarijiet li għalihom ingħatajt risposti li llum irriżultaw kollha fil-baħħ.

Jien u naħseb fuq dan kollu għaddieli minn moħħi li anke’ Joseph Muscat, dak iż-żmien Kap tal-Oppożizzjoni, x’aktarx għamel dawn il-mistoqsijiet u oħrajn lir-raġel ta’ Sai Mizzi Liang qabel ħa r-responsabbiltà (taparsi) tal-pjan kollu. Dan ifisser li qabel Konrad Mizzi beda jipprova jgħaddi ż-żmien bija u bina lkoll, kien għamel l-istess lill-mexxej Laburista.

Jien ma blajtiex. Muscat belagħha u belagħha sa griżmejh!

Mazzun.