Blajtu lsienkom?

M’għandix dubju li ndunajtu. Allura ma nistax nifhem kif għadkom siekta. 

Intom li għandkom meter tad-dawl kummerċjali. Intom is-self-employed, is-sidien ta’ negozju, il-lukandiera, tal-ħwienet, tar-ristoranti, importaturi, industrijalisti kbar u żgħar, kumpaniji u ħafna oħrajn.
 
Tafu li llum iż-żejt jiswa’ terz inqas minn kemm kien jiswa’ fix-xhur tas-sajf. Tafu wkoll li intom għadkom tħallsu għall-elettriku bl-istess rati għoljin li kontu tħallsu meta ż-żejt kien iqum darba u nofs ta’ dak li jqum illum.

Tafu li bqajtu tħallsu l-istess prezzijiet anke għall-petrol u għad-diesel li tużaw fil-vetturi u fil-magni tagħkom.

Żgur indunajtu li llum l-Enemalta jew xi ħadd ieħor qed jaqla’ l-miljuni minn fuq daharkom għalxejn. Miljuni li jistgħu jibqgħu fi bwietkom. Miljuni li tistgħu tużaw biex tinvestu u biex toħolqu iktar xogħol.

Allura għaliex dan is-silenzju?

X’sar minnu l-ħafna d-diskors fuq il-kompetittività?

Jew din il-kelma tużawha biss meta tiġi biex tingħata ż-żieda jew xi ġurnata leave żejda lill-ħaddiema?

Sinjuri tal-Kamra tal-Kummerċ, l-Intrapriża u l-Industrija, tal-GRTU, tal-Assoċjazzjoni ta’ min iħaddem, blajtu lsienkom?