Min jiskonġra jrid ikun pur?

“Min jiskonġra jrid ikun pur?” staqsietni ġurnalista tal-gazzetta ILLUM.  

“L-Oppożizzjoni tinsab f'pożizzjoni li tikkritika lill-Gvern minħabba li hi kienet responsabbli mill-iżbalji li saru qabel fi żmienha?” kompliet tistaqsini.

Weġibna għal dawn il-mistoqsijiet jiena, Carmel Cacopardo, Peppi Azzopardi u Simone Cini. 

Din hija t-tweġiba tiegħi li kienet ippubblikata fil-ħarġa tal-lum:

L-ewwel darba li missieri qabadni npejjep sigarett tani ċamata. Is-sigarett li qabadni bih kont ħadtu mill-pakkett tiegħu. Hu kien ipejjep ferm iktar minni. Ir-risposta tiegħi għall-paniġierku li għamilli kienet sentenza waħda, “biex tiskonġra trid tkun pur”.

Meta ħafna snin wara rnexxieli nieqaf inpejjep il-ħsara li għamilt lili nnifsi ma rranġatx mil-lum għal għada. Lanqas il-flus li nfaqt f’duħħan ma ġew lura.

Kien ikun ferm aħjar għalija kieku tajt każ tal-iskunġrar ta’ missieri minflok qagħdt ninħela niġġudika in-nuqqas ta’ purita tiegħu. U jekk għada pitgħada ibni jkun qed jagħmel l-istess żbalji li nagħmel jien, dmiri jkun li nagħmel miegħu kif għamel miegħi missieri. U jekk jagħmel agħar ikolli ninħanaq ftit iktar ta’ spiss.

B’dan kollu ma rridx infisser li jien m’għandix nipprova nirranġa d-difetti tiegħi. Anzi. Min irid il-ġid lilu nnifsu ma jillimitax ruħu biss għall-priedki. Kieku snin ilu missieri sema’ minn dak li kien qed jgħid lili u waqaf ipejjep kien ikun aħjar għalih ukoll.

Bl-istess mod, indipendentement minn dak li ġara fil-passat, l-Oppożizzjoni Nazzjonalista għandha dmir u obbligu lejn il-poplu Malti li tiskrutinizza dak kollu li qed jagħmel il-Gvern u li tikkritikah.

Hija tassew ħasra li din il-kritika spiss titqies bħala attakk. Il-kritika għandha titwieġeb b’azzjonijiet pożittivi, bħal m’huma iktar trasparenza, iktar kontabiltà, iktar onesta u iktar serjetà fit-tmexxija. 

Ħasra li r-reazzjoni tal-Gvern Laburista ħafna drabi tkun kontrattakk li l-poplu ma jieħu assolutament xejn minnu.

Iżda jagħmel x’jagħmel il-Gvern, l-Oppożizzjoni m’għandha qatt tonqos milli taqdi dmira ta’ oppożizzjoni.

Fl-istess waqt il-Partit Nazzjonalista għandu jkompli jaħdem biex jibni alternattiva serja għall-Gvern li għandna llum.