Imn’alla l-Eurovision sar taħt il-Labour

Bħal ħafna oħrajn ilbieraħ tpaxxejt bl-ispettaklu li pajjiżna kien kapaċi joffri bl-organizzazzjoni tal-Junior Eurovision. Apparti l-inċident tal-qtugħ tad-dawl fid-dress rehearsal ta’ lejliet li żgur ma kienx ħtija tal-organizzaturi, kulħadd jaqbel li l-pakkett offrut minn pajjiżna kien prattikament perfett.

Iżda waqt it-televoting ġrali li ntlift fil-ħsibijiet. Bħal sajjetta fil-bnazzi moħħi beda jistħarreġ x’kien jiġri kieku dan l-avveniment inzerta ġie fi żmien Gvern Nazzjonalista.

U bdejt nimmaġina headlines b’ittri kbar fuq l-orizzont u l-Kullħadd jakkużaw lill-PBS u lill-Gvern b’ħela u tberbiq.

Bdejt nisma’ fil-bogħod lid-Deputati tal-Labour jistaqsu fil-Parlament kemm ġiet tiswa’ dik il-bozza, kemm qamilna dak l-ispeaker u kemm ħallasna lill-preżentatriċi.

Ilmaħt il-ġurnalisti tal-Malta Today jinvestigaw mingħand min inxtraw jew inkrew il-ħadid, is-siġġijiet, il-karozzi, il-lukandi u jekk dawn humiex kuġini, zijiet jew business partners ta’ xi ras kbira.

Rajt l-aħbarijiet tal-ONE jiftħu bi storja kbira ta’ allegata korruzzjoni u suspetti ta' tixħim.

"Hawn ħa... Ġibtlek ieħor."

Jien u newden xi ħadd ġabli pinta oħra u dlonk erġajt ġejt f’sensija.

Malli ħassejt id-dehxa tar-ragħwa kiesħa ma’ xuffteja mill-ewwel frakart li issa żmien in-negattivita spiċċa.

U ħadt nifs twil u għidt bejni u bejn ruħi “Imn’alla l-Eurovision sar taħt il-Labour!”