Se jsib iż-żejt jew se jirriżenja?

Wieħed mill-kummenti taħt il-blog tal-bieraħ dwar kemm hu iktar galantom bi flusna l-Ministru Joe Mizzi minn dak il-qammiel ta’ Austin Gatt fakkarni f’dikjarazzjoni li kien għamel Mizzi fil-Parlament meta kien għadu jpoġġi fuq in-naħa tal-Oppożizzjoni.

Fittixt u sibt rapport tat-Times jikkwotah jgħid li jekk meta jkun hemm Gvern Laburista ma jsibx iż-żejt, hu jirriżenja.

Biex ma jmurx xi ħadd jaħseb li tat-Times kienu kwotawh ħażin fittixt x’kien qal eżatt fil-Parlament.

Sibt it-transcript oriġinali tas-seduta. Jekk trid taqraha kollha kemm hi tista’ tikklikkja hawn. 

Għal dawk li m’għandhomx ħin x’jaħlu, is-silta relevanti hija din:

“Sur President, jiena nista` ngħid li għad hawn min hu interessat li jiġi fit-territorju tagħna biex itella` ż-żejt għax jaf li hemm iż-żejt pero’ mhux lest li jiġi issa għax m'għandux fiduċja fil-gvern preżenti. Aħna persważi li kif jinbidel il-gvern u nitilgħu aħna, dik il-materja prima nsibuha. Persważ minnu dan. Tant jien persważ li jekk ma jkunx hekk  nirriżenja. Ma jkollix għalfejn nibqa’ hawn. Jiena persważ li, iva, taħt il-gvern Laburista għax hemm is-serjeta` din il-ħolma li nsibu ż-żejt issir realta`.  Diġa’ hemm min hu interess li meta jkun hemm il-partit laburista fil-gvern jiġi biex jagħmel ix-xogħol bis-serjeta`.”

Nistennew u naraw x'se jiġri.

Għal dawk dilettanti tal-imħatri, iż-żejt li jaqa' mill-magni tal-karozzi tal-linja moderni li ġabilna l-Ministru Mizzi ma jgħoddx.